Sali fo’i Panchi, kai den kandela.
Sali fo’i Panchi, kai den kandela.
Awor ku baka a hoga na pos, Gabinete Pisas ke pidi yudansa di Parlamento purá purá, pa skapa nos komunidat.
Ku indignashon Frakshon di PAR a tuma nota di e karta di Minister di Asuntunan General a.i. i dirigí na Parlamento di Kòrsou, den kua karta, Gabinete Pisas ta pidi Parlamento di Kòrsou yudansa entre otro na IPKO pa sali for di e problema grave den kua el a bolbe hinka pais Kòrsou.
Dia 14 di sèptèmber último, tumando nota di informashonnan sumamente preokupante ku a sali den Prensa enkuanto e negosiashonnan rondó di e problemátika di ENNIA, Frakshonnan di MAN, PAR i TPK a aserka Presidente di Parlamento ku e petishon pa un reunion Públiko promé ku dia 30 di sèptèmber, p’asina risibí informashon di Gobièrnu, debatí i duna aporte na un solushon pa ENNIA.
E petishon aki a wòrdu ninga dor di Minister Pisas, bou di e mentira flagrante ku tin un “media stilte” rondó di e tema. Maske tantu Hulanda i Sint Maarten si a tuma tempu, respetá i informá representante di Pueblo tokante e negosiashon i senarionan ku Hulanda, Gabinete Pisas a yama Parlamento “buskadó di problema” i a nenga di bini, violando asina nos areglo di Estado.
Apesar di e ‘media stilte’, ta den medionan di komunikashon Parlamento a tuma nota ku Gabinete Pisas dia 5 di òktober último, despues di a negoshá 4 luna largu un Bestuurlijk Hoofdlijnenakkoord ku Hulanda, a tira un “monkey wrench” último ora i ninga e fiansa ofresé pa Hulanda, ku lo a garantisá pago di e penshun kompletu di e 30.000 aseguradonan i salba ENNIA.
Gobièrnu sinembargo te awe NO por garantisá 100% di pago di penshun i no tin un solushon kla pa e problema.
Pa koroná obra, ta resultá ku Gabinete Pisas a “pega barku” malamente, ya ku dor di nan aktitut deskabeyá, pueblo tin ku bai paga 79 mion florin den 2024 na Hulanda pa e fiansa di Covid, ku ta 10 mion mas ku e 69 mion ku tur dos fiansa huntu (Covid i ENNIA) lo a kosta komunidat, i atrobe sin ningun garantia ku por paga 100% di penshun i salbando e kompania. Pueblo a sali di panchi, kai den kandela.
Awor ku baka a hoga na pos, direpente Gabinete Pisas ta kore aserka Parlamento un biaha mas purá purá, pa pidi yudansa pa skapa di e doló di kabes den kua nan a hinka Pueblo di Kòrsou. Frakshon di PAR ta eksigí gobièrnu pa duna rèspèt na representashon di Pueblo, duna klaridat i splikashon riba e posishon difísil ku nan a hinka Kòrsou i e aseguradonan di Ennia aden.
