Hòfi Mango ta risibí Parlamentu den parke i kompartí plannan di futuro

Hòfi Mango ta risibí Parlamentu den parke i kompartí plannan di futuro

Willemstad, 9 di Òktober 2023 – Djaluna mainta pa promé biaha miembronan i staf di Parlamentu di Kòrsou, huntu, a bishitá e parke di naturalesa, Hòfi Mango, ku ta situá na Santa Cruz. Na e okashon aki, Jandino Asporaat huntu ku su tim a guia e grupo grandi,  p’asina nan por a eksperenshá e bunitesa sublime ku Hòfi Mango ta ofresé, entre otro e naturalesa ku su vibrashon sanativo, pero tambe áreanan histórikamente relevante i adishonan artístiko i  komersial. Alabes Jandino a kompartí ku nan e plannan pendiente pa Hòfi Mango kual ta konsistí di adishon di un restorante, adishonnan relatá na ‘wellness’, un museo, un tienda i finalmente komo atrakshon e promé ‘zipline’ ku Kòrsou lo konosé.

Sumamente impreshoná, asina miembronan i staf di Parlamentu a reakshoná na final di e rekorido rònt di e parke.  Spesífikamente pa loke ta trata e balansa entre ‘ofresé i elevá e eksperensha ku Naturalesa’ i alabes ‘Desaroyonan Komersial ku lo kumbiní tantu e parke komo Banda Abou i Kòrsou. Pa e tim di Hòfi Mango, e bishita di Parlamentu di Kòrsou tabata un bunita oportunidat pa inspirá nos parlamentu pa medio di eksperenshanan úniko den e parke kombiná ku splikashonnan a fondo tokante e desaroyo di e parke i e esfuersonan ku ta hasiendo pa logra e plannan pa Hòfi Mango den futuro serkano.

 

Rekorido di Parlamentu den Hòfi Mango

E rekorido organisá pa Parlamentu a tuma en total tres ora i a start na e Molina di Suku konstruí na aña 1707. Meskos ku mas edifisio riba e tereno, asaki a keda restourá pa por a mantené karakterístikanan ku ta konta momentunan signifikante den e historia di Kòrsou. Ku kada paso e grupo a eksperenshá e naturalesa i fertilidat di Hòfi Mango. Na momentu ku Hòfi Mango a habri pa públiko den sèptèmber 2022, a inisiá un kolaborashon ku IPE (Institute for Professional Excellence) pa lansa un kurso di hardinero, kaminda un kantidat di kursista a profeshonalisá ku habilidatnan den e area di agrikultura i mantenshon di hardín. A splika tambe ku Hòfi Mango a inisiá un kolaborashon ku Bart Siemerink ku tabata forma parti di e tim di maneho di Keukenhof, e parke di flor internashonalmente renombrá. A sigui splika e motibu ku e area ta asina fértil. Hòfi Mango ta realisá maneho di awa, i a renobá dam i riól di awa ku ta pasa dor di e parke.

 

Masashi den Naturalesa

Na e Muraya di Libertat, kual ta separá e boske di Manzaliña ku e boske di Mango, Jandino Asporaat a urgi miembronan di parlamentu i staf pa laga tur kos pisá òf negativo atras na e manzaliña, i drenta e area di Mango disfrutando di e dulsura di e airu ku ta trigger i inspirá ideanan nobo i kreativo na bienestar di nos komunidat. Den e boske ku mas ku 1200 palu di Mango, Parlamentu a keda sorpresá ku músika suave klásiko i despues masashi rondoná pa naturalesa ku músika ‘Sound Healing’ ku den e kaso di Hòfi Mango ta e kombinashon die zonidu di naturalesa i instrumentunan speshal pa esaki.

 

Despues di e introdukshon aki, e grupo a subi e seru yamá Kenjiro kaminda por a disfrutá di e bista bunita di Hòfi Mango for di ariba na e arte produsí dor di Giovanni Abath, e ‘Man di Dios’. E enkuentro ku Parlamentu a finalisá ku un Li di Mango i Rom Tambú na e futuro restourante guía pa Master Chèf Balentina nasé na Kòrsou i renombrá rònt Europa. Lo ubiká e restourante den e edifisio di destilashon konstruí den 1707, ku aktualmente ta den proseso di restourashon.

For di e momentu ku Hòfi Mango a habri su portanan den sèptèmber 2022, ya a risibí mas ku 30.000 bishitante lokal i turista. Hòfi Mango tin elementonan di nos historia, e Kòrsou di nos antepasadonan, i alabes e promesa di e Kòrsou di futuro. E team di Hòfi Mango ta dediká na inspirá i elevá e espiritu di kolaborashon, dor di habri su portanan pa públiko, pa tour, inisiativanan edukativo, kurso i teambuilding. Hòfi Mango ta habrí tur dia di siman.