Minister di Enseñansa ta bishitá studiante-atletanan den proyekto ‘Role Model’

 

 

Willemstad- Minister di Enseñansa, Kultura i Deporte, Sithree van Heydoorn, a hasi un bishita na KONTENTU Begeleiding pa asina duna sosten na e studiante atletanan ku awor tin un luna ku a kuminsá e proyekto piloto kaminda ta guia e studiantenan.

 

Durante e bishitá ku a tuma lugá na lokalidat di KONTENTU Begeleiding na Emmastad, Minister di Enseñansa, Kultura i Deporte, Sithree van Heydoorn, a hasi uso di e oportunidat pa papia un ratu ku e studiante atletanan i tambe e dosentenan riba e trayekto ku nan lo  kana e aña eskolar aki. Ademas, van Heydoorn a enfatisá e sosten di e mes i su ministerio pa trayekto aki.

 

Manera anteriormente indiká, e proyekto piloto yamá ‘studiantenan atleta’ ta un proyekto lansá pa KONTENTU Begeleiding kaminda lo guia 20 studiante atleta, 10 di futbòl i 10 di beisbol, durante un aña eskolar, riba tereno akadémiko i tambe yuda ku desaroyo propio ku enfasis riba komunikashon.

 

E proyekto aki ta suprayá e importansia di mantené un balansa entre edukashon i deporte na nivel máksimo. Dor di ofresé ‘huiswerkbegeleiding’ i kursonan di komunikashon, e studiantenan atleta por saka nan máksimo potensial tantu riba tereno deportivo, komo akadémiko ku e proyekto aki.

 

Minister van Heydoorn a indiká ku e ta kere firmemente den e poder di edukashon i deporte pa forma nos hubentut i duna nan un mihó base ku lo garantisá un mihó futuro pa kada un di e studiantenan atleta.