Minister Shalten Hato SELEBRASHON DI DIA DI TRAHADÓNAN DI PRIZÒN

Minister Shalten Hato
SELEBRASHON DI DIA DI TRAHADÓNAN DI PRIZÒN

Tradishonalmente e di dos djasabra den luna di òktober, ta konmemorá e dia di trahadónan di prizòn. Nòrmal esaki ta keda konmemorá i selebrá durante henter un siman, kaminda vários aktividat ta keda organisá pa trahadónan di prizòn i tambe ku oportunidat ku tur kolega ku ta traha den prizòn, lo por topa otro koleganan di Boneiru, Aruba, St.Maarten i Sürnam, pa asina interkambiá i sosialisá den vários aktividat huntu.
E aña aki e siman di trahadónan di prizòn a tuma lugá na Sürnam, pero tòg a organisá aktividatnan pa e personal di prizòn aki na Kòrsou. E personal di SDKK por a disfrutá di dos dia di aktividat, kual tabata enserá desayuno i tambe den oranan di atardi un Happy Hour ku Karaoke. Na e okashon aki tabata tei presente Minister Charles Cooper den representashon di Minister Shalten Hato.
Riba e djasabra a tuma lugá un misa den Kapel na SDKK bou di guia di Pastor Jose luis i despues tur personal presente por a disfrutá di un tremendo almuerso.
Minister Shalten Hato ta sumamente kontentu ku tòg por a pone atenshon riba e dia i ta dispuesto pa huntu ku Ministerio di Hustisia kontribuí na preparashon di siman di trahadónan di prizòn ku lo tuma lugá otro aña aki na Kòrsou.