Minister Shalten Hato SELEBRASHON DIA DI BOMBERO
Den wikènt tras di lomba Minister Hato tabata presente na selebrashon di dia di bombero na Grillz Food Station. Ta asina ku na aña 2008 Konseho Insular di Kòrsou a proklama e djasabra rondó di 9 di òktober komo dia di Bombero.
Ser un bombero hoy en dia ta un trabou noble ku bo mester hasi ku konvikshon i amor pa bo kosiudadanonan. E peligernan ku nan ta enkontra i e retonan ta enorme. Pa engrandesé e kuerpo di bombero mester di invershon den kapital humano komo den material.
Den kuadro di esaki resientemente Minister Hato a nombra un komandante nobo pa guia i liderá e kuerpo di bombero ku lo kuminsá awe, 16 di òktober 2023. E komandante nobo aki entre otro lo mester sòru pa implementashon di e asina yamá “Verstevigingsplan Brandweer”.
Adishonalmente entrante yanuari 2024 lo inisiá ku un klas nobo di 25 aspirante pa fortifiká e kuerpo di bombero kendenan den wikènt a haña un kopia di nan Landsbesluit.
Ku balentiá, amor pa trabou, determinashon, perseveransia i dedikashon bomberonan ta ehersé nan tarea komo “Pagadó di Kandela” tur dia di nobo. DANKI na kada un persona den kuerpo di bombero ku 365 dia pa aña, 24 ora pa dia tei pa prevení, prepará i sirbí nos komunidat.
