Minister Shalten Hato TRES MIEMBRO DI KUERPO POLISIAL KÒRSOU TA BAI SIGUI KURSO NA MIAMI DADE SCHOOL OF JUSTICE
Minister Hato den wikè tras di lomba tabata presente na airport pa deseá algun agente polisial eksito ku nan entrenamentu na Merka. Den kuadro di esaki 3 miembro di Kuerpo Polisial Kòrsou lo bai sigui un entrenamentu speshalisá na ‘Miami Dade College School of Justice’ na Miami. E treining aki a bira posibel, danki na esfuerso di Minister di Hustisia, Shalten Hato, e kolegio di hefenan di e kuerponan di polis den reino kual ta konta ku partisipashon di hefe di Kuerpo Polisial Kòrsou, sr. Raymond Ellis.
Durante di e treining aki, e agentenan lo bai risibí preparashon riba diferente área ku ta konserní tráfiko manera e.o.:
– Manehá vehíkulo polisial mei mei di barera, riba velosidat haltu, téknikanan di kue brek, bògt èts.;
– Kon ta e mihó manera pa maniobrá vehíkulo polisial na momentu ku tin fila òf tráfiko pegá;
– Téknikanan di patruyahe i proseduranan pa para vehíkulonan pa kontròl.
Durante di e treiningnan aki lo bai pone atenshon tambe na e aspekto di glas skur. Kon ta aserká e vehíkulonan aki i kua ta e téknikanan pa husga visualmente e komportashon di e okupantenan i muchu mas.
E vishon di Minister Hato ta pa huntu ku Tim di Maneho di Kuerpo Polisial, sigui ekipá e organisashon pa e por kontinuá brindando komunidat servisio di forma profeshonal, huntu ku otro partnernan keda duna atenshon na prevenshon i kombatímentu di krímen.
