PRINSESA BEATRIX TA BISHITÁ KÒRSOU NOVÈMBER
MINISTERIO KONSERNÍ ASUNTUNAN GENERAL I PROMÉ MINISTER
PRINSESA BEATRIX TA BISHITÁ KÒRSOU NOVÈMBER
PUBLIKÁ RIBA 17 ÒKTOBER 2023
Willemstad – Su Altesa Real Prinsesa Beatrix di Hulanda ta bishitá Kòrsou i Aruba di djamars 7 te ku djabièrnè 10 di november. E bishita tin komo tòpiko ‘Dutch Caribbean Nature Alliance’ (DCNA). Tambe lo pone atenshon na algun inisiativa sosial den nos komunidat. E prinsesa ta patronisá DCNA. Motibu di e bishita aki tambe ta pa duna atenshon na un kongreso di DCNA tokante solushonnan natural pa rekuperá e sistema ekológiko di e islanan Karibe Hulandes.
E programa ta kuminsá na Landhuis Savonet, riba djamars mainta 7 di novèmber. Landhuis Savonet (1662) tabata parti di un di e plantashonnan mas grandi di Kòrsou. Den 2010 i 2018 a restaurá e edifisio. E parke rondó di e edifisio ta kai bou di maneho di Carmabi (Caribbean Research & Management of Biodiversity Foundation). Carmabi ta partner di DCNA. Prinsesa Beatrix lo haña un rekorido kòrtiku den e museo di Landhuis Savonet. Tambe, e ta atendé un lès edukativo ku un grupo di mucha di skol bàsiko. E muchanan ta bai siña tokante konsekuensia di shushi den naturalesa di Kòrsou. Despues, personal di Carmabi lo duna e Prinsesa splikashon di e importansia klimatológiko di parke Kristòf i tokante kuido di animalnan den e área.
Prinsesa Beatrix, novèmber 2021 na e ‘mondi di kuminda’ (voedselbos) na Brievengat
E siguiente dia, djárason 8 di novèmber mainta, prinsesa Beatrix ta bishitá Fundashon Ser’i Otrobanda. E inisiativa aki ta krea kunukitunan den bario di Otrobanda. Esaki pa stimulá e habitantenan pa ta outosufisiente i pa komé salú. E idea a surgi durante e krísis di Korona, ora mester a yuda famianan ku pakete di kuminda. Ku kreashon di kunukitunan den bario, e habitantenan mes ta kultivá berdura i fruta. Tambe nan tin mas kontakto ku otro i tin mas aktividat den bario. Fundashon Ser’i Otrobanda ta risibí sosten di Oranje Fonds. Durante e bishita lo splika prinsesa Beatrix kon e kunukitunan a kuminsá i dikon nan ta importante. Tambe e lo topa ku algun di e boluntarionan.
Djárason anochi, e bishita di trabou na Kòrsou ta kaba ku un sena na Palasio di Gobernador Lucille George-Wout.
Djaweps 9 di novèmber e bishita ta siguí na Aruba i ta kaba djabièrnè 10 di novèmber
