PA PROME BIAHA DEN HISTORIA, GOBIERNO DI ARUBA TA PRESENTA UN PRESUPUESTO CU FONDO ADICIONAL
Prome Minister Evelyn Wever-Croes:
Danki na e maneho financiero estricto y responsabel di Gabinete Wever-Croes
PA PROME BIAHA DEN HISTORIA, GOBIERNO DI ARUBA TA PRESENTA UN PRESUPUESTO CU FONDO ADICIONAL
ORANJESTAD – Dialuna anochi, durante un conferencia di prensa extraordinario di Gobierno di Aruba, Gobierno a informa comunidad di Aruba riba e resultado positivo di e maneho financiero estricto y responsabel, cu Gabinete Wever-Croes ta bin ta hibando. Prome Minister Evelyn Wever-Croes a reitera, e importancia cu e topico di maneho financiero tin, desde inicio di gobernacion, pa e gobierno di Gabinete Wever-Croes II. El a splica cu hopi biaha e discusionnan riba e topico aki ta entorno cu e discucionnan cu Hulanda, si mester ta mas estricto, of si mester baha gasto, of aumenta entrada etc. Prome Minister y demas minister cu hopi orguyo a comparti cu pueblo e bon noticia, cu pa prome biaha den historia di pais Aruba, Gobierno ta entrega un presupuesto supletorio pa 2023, cu entrada adicional di 25 miyon florin.
Prome Minister a expresa cu e ta sumamente orguyoso di su Gabinete pa cu e logro aki, mirando cu den pasado, durante gobernacionnan anterior, presupuestonan supletorio tabata yega Parlamento, pa pidi aprobacion riba placa cu a wordo gasta caba, na fin di aña, casi na momento di tira pagara, y e supletorionan aki semper tabata tin deficit adicional, chikito y tin biaha hopi grandi, di miyones di florin extra. Desde cu Gabinete Wever-Croes a drenta gobernacion, semper a percura pa e presupuestonan supletorio ta budget neutral, y danki na e bon trabou, y disciplina di cada minister, awe por mira resultadonan positivo.
Cu e 25 miyon florin adicional, Gobierno por inverti den proyectonan importante pa pais Aruba. Durante e conferencia di prensa, cada minister tabata tin e oportunidad pa splica na kico e fondo adicional aki, lo bay wordo aplica. “Mi kier gradici cada minister di e Gabinete aki, pasobra ta danki na e vision y determinacion, y na e disciplina di cada un di nan, awe nos a logra esaki. Un danki special tambe na Minister di Finansa Xiomara Maduro, cu semper a traha duro, pa bienestar financiero di pais Aruba. Esaki sigur ta un momento di hopi orguyo y felicidad, di por comparti cu pueblo e bon noticia aki, y pa sa cu tur nos esfuerso y trabou incansabel, awe a duna su fruto”, Prome Minister a expresa.
