Sushedat riba e kaminda entre Zegu pa Landfill Malpais
Na: Presidente di Parlamento di Kòrsou
Sra. Ch. America-Francisca
Wilhelminaplein 4
Presente
Kòrsou, 23 òktober 2023
Tópiko: Pregunta na Minister di Salubridat Sr Javier Silvania riba: Sushedat riba e kaminda entre Zegu pa Landfill Malpais
Honorabel sra. America-Francisca,
Señora presidente, pa medio di e karta aki suskrito ke hasi uso di artíkulo 96 di Reglamentu di Òrdu i pa medio di bo persona por dirigí e karta aki ku e tópiko: ‘Sushedat riba e kaminda entre Zegu pa Landfill Malpais.‘ na Minister di Salubridat Sr Javier Silvania.
Atentamente,
Ana Maria Pauletta
Frakshon di PAR
Minister di Salubridat
Sr. Silvania
Colon
Presente
Kòrsou, 23 òktober 2023
Tópiko: Sushedat riba e kaminda entre Zegu pa Landfill Malpais
Apresiabel Minister Silvania,
Ta di vital importansia pa nos konservá nos naturalesa i demostrá ku nos por mantené nos pais limpi. Esaki ta di benefisio pa nos medio ambiente, pero tambe pa desaroyo ekonómiko di pais. Un di e atrakshonnan di mas grandi di nos, komo Isla den Karibe, ta nos flora i founa diversifiká. Turistanan ta bin di leu pa disfrutá di esaki.
Resientemente suskrito a tuma nota ku e kaminda despues di rotònde di Zegu pa yega na e instalashonnan di Landfill Malpais, na tur dos banda di kaminda ta inmensamente sushi. Komo suskrito ku regularidat ta limpia e área aki, ku gruponan di boluntario, ta konosí pa suskrito ku hopi di e sushi ku ta kantu di e kaminda ei, ta sushi ku ta bula i kai for di trùknan ku ta transportá sushi.
Mayoria di e trùknan ku ta hasi uso di e kaminda aki, tin komo destinashon Landfill. Nan ta kore ku nan karga di sushi, hopi biaha sin kubri esaki, pa asina nan por depositá esaki na Landfill. Apesar ku nos lei di Órden Públiko ta indiká ku mester kubri e sushi na momentu ku ta transportá. Komo kompania ko-responsabel pa limpiesa di nos pais, Selikor ta hasi su máksimo esfuerso pa tene nos pais limpi. Resientemente nos por a tuma nota di trahadónan di Selikor ku di forma boluntario a limpia e kaminda entre Souax pa Aeropuerto, sigur algu di aploudí enormemente.
A base di e puntonan trese dilanti, suskrito tin e siguiente preguntanan:
- Minister Silvania ta konosí ku e situashon di sushedat kantu di e kaminda entre Zegu i instalashonnan di Landfill Malpais ? Minister lo por informá Parlamento ku kua frekuensia Selikor ta laga limpia e kaminda ei?
- Minister enkargá ku limpiesa lo por instruí Selikor pa mantené e kaminda aki limpi i invertí den programanan di konsientisashon pa nan usuarionan pa kubri nan sushi i evitá ku sushi ta bula bai i okashoná sushedat kantu di kaminda ?
- Minister den kombersashon ku Selikor, huntu ku ministerio di Hustisia por yega na akuerdonan di trabou, kon Selikor por yuda vigilá ku tur hende ku ta transportá sushi pa Landfill hasi esaki konforme nos leinan di Órden Públiko ?
Danki di antemano,
Ana Maria Pauletta
Miembro di Parlamento, Partido Alternativa Real
