PROMÉ MINISTER SR. GILMAR PISAS A RISIBÍ E KORDINADÓ RESIDENTE PA NASHONAN UNÍ

Willemstad – Promé Minister sr. Gilmar Pisas, huntu ku miembronan di Gabinete Pisas II, a risibí e Kordinadó Residente pa Nashonan Uní (UN) pa Trinidad & Tobago, Sürnam, Kórsou, Aruba i St. Maarten sra. Joanna Kazana-Wiscionisci dia 25 di òktober 2023.

 

Meta di e bishita aki tabata pa sra. Kazana-Wiscionisci presentá su kredensial na Promé Minister di Kòrsou sr. Pisas.

E Ministernan ku tabata presente durante di e reunion di Konseho di Minister tabata  Minister di Desaroyo Ekonómiko sr. Ruisandro Cijntje, Minister di Desaroyo Sosial, Labor i Bienestar sra. Ruthmilda Larmonie-Cecilia, Minister di Maneho di Gobernashon, Planifikashon i Servisio Públiko sr. Ornelio Martina, Minister  di Enseñansa, Siensia, Kultura i Deporte sr. Sithree van Heydoorn, Minister di Tráfiko, Transporte i Planifikashon Urbano sr. Charles Cooper, Minister di Hustisia sr. Shalten Hato i Promé Minister sr. Gilmar Pisas.

 

Durante di e reunion aki a elaborá riba diferente punto manera entre otro kambio di klima, digitalisashon, edukashon, salubridat, desaroyo sostenibel i ekonómiko, protekshon sosial, sistemanan di alimentashon, imigrante i refugiadonan.

 

Durante di e bishita kòrtiku aki, di 25 pa 27 di òktober 2023, e la tuma e oportunidat pa skucha di parti di Gobièrnu di Kòrsou tambe kua ta e prioridatnan ku Gobièrnu tin riba e parti di desaroyo sostenibel, kon leu Kòrsou ta ku e implementashon di e “Country Implementation Plan” (CIP), ku aktividatnan relevante ku ta konkluí na resultadonan relashoná ku e “Multi-country Sustainable Development Cooperation Framework (MSDCF) i kon ta bayendo ku e asistensia ku tabatin òf tin ainda ku e diferente agensianan, fondonan òf programanan asosiá di UN ku e ta responsabel pe.

Varios agensia di Nashonan Uní ku ta aktivo den nos región a kompaña Sra. Kazana kualnan ta UNWomen, UNOPS, UNHCR, ILO i IOM.

 

E bishita aki tabata su promé bishita na Kòrsou i pa e i su delegashon a organisá diferente reunion ku diferente ministerio di Gobièrnu di Kòrsou. A organisá un reunion tambe ku e Plataforma Dialogo Tripartite Kòrsou.

Riba nan mes, algun di e agensianan a tene reunion tambe ku otro instansianan aki na Kòrsou.

E delehashon a haña oportunidat tambe pa hasi un bishita serka Gobernador sra. Lucille George-Wout.

 

E dferente ministerionan ku a reuní ku e delegashon di sra. Kazana-Wiscionisci tabata Ministerio di SOAW, Ministerio di OWCS, Ministerio di GMN, Ministerio di VVRP i Ministerio di Hustisia. i e Ministerio di Desaroyo Ekonómiko a ofresé e delegashon un sena kaminda por a diskutí riba diferente tema den un ambiente hopi ameno.

 

Sra. Joanna Kazana-Wiscioniscia tabata hopi kontentu ku e bishita aki i ela gradisí Promé Minister sr. Pisas i e SDG Coordination Team inmensamente pa tur loke a keda prepará pa e i su delegashon su bishita i estadia na Kòrsou.

E la indiká ku otro aña e lo plania un biahe kaminda e i su agensianan por krea mas espasio pa reuní ku mas organisashon aki na Kòrsou.

 

E bishita aki tabata unu hopi fruktífero i éksitoso.