RESOSIALISASHON DI KLIENTENAN SDKK POR MEDIO DI ENSEÑANSA
Ministernan Sithree van Heydoorn i Shalten Hato a firma dos (2) protokòl den kual primeramente e dos ministerionan ta komprometé nan mes pa traha di forma mas estrecho riba tereno di prevenshon i resosialisashon ku e meta pa kombatí kriminalidat en partikular bou di hobennan. Esaki ta un kombenio amplio bou di kual vários proyekto lo resortá.
Banda di esaki, finansiá for di fondonan di kriminalidat, SDKK por bai duna kontenido real na e parti di korekshon, brindando e klientenan diferente trayekto di edukashon di fishi, kual kursonan di formashon lo ta na enkargo di OSBOD, ku ta para pa “Openbaar Secundair Beroeps Onderwijs Deeltijdopleidingen”.
Ta trata aki di e proyekto “Learning inside out”, ku otro palabra “Siña paden durante e periodo di enkarselashon pa ta mihó prepará ora sali pa subi merkado laboral òf sigui studia”. Momento ku un persona ta sinta un kastigu penal, gobièrnu tin e obligashon pa trata mas tantu posibel pa reformá e persona i asina krea perspektiva pa na momento ku e bandoná e sentro penitensiario, e no mester bolbe kai den e mesun situashon ku e tabata.
