Den e siman di 30 di òktober 2023 pa 3 di novèmber 2023, Presidente di Parlamento di Kòrsou, señora America-Francisca, a asistí na e reunionnan di Eurolat.

Parlamento di Kòrsou

Den e siman di 30 di òktober 2023 pa 3 di novèmber 2023, Presidente di Parlamento di Kòrsou, señora America-Francisca, a asistí na e reunionnan di Eurolat. Eurolat ta e Asamblea Parlamentaria Euro-Latinoamericana kaminda ta tene reunionnan entre e komponentenan parlamentario di Oropa i Latino Amerikano. Manera ta konosí e reunion aki ta tuma lugá dos biaha pa aña, di kual un biaha na Oropa i un biaha den Latino Amérika. E biaha aki a toka turno na Latino Amérika i Repúblika Dominikana tabata anfitrion i reunionnan mes a ser tené den e salanan di reunion di e Senado di Santo Domingo, Repúblika Dominikana. Presidente di Parlamento Kòrsou ta asistí na e reunionnan aki atraves di e representashon den Parlatino i pa Parlatino ta miembro di e “Comisión de Desarrollo Sostenible, Medio Ambiente, Política Energética, Investigación, Innovación y Tecnología”.
Apertura di e Eurolat mes a tuma lugá den e sala di Asamblea General kaminda e Vise Presidente di Repúblika Dominikana, Presidente di e Senado, Visepresidente di e Senado i e Presidentenan di e diferente komponentenan di Latino Amerikano i Oropa a hiba palabra. Presidente di Parlamento tabatin e oportunidat di a será konosí i hiba algun palabra ku e Presidente di Senado Repúblika Dominikana, señor Ricardo De los Santos.
Na inisio di e reunion di “Comisión de Desarrollo Sostenible, Medio Ambiente, Política Energética, Investigación, Innovación y Tecnología” a vota riba 54 amienda riba e proyekto di informashon di “Declaración Universal de los Derechos de la Naturaleza”. Despues a sigui ku interkambio entre riba diferente tema ku ta kai bou di e komishon aki, manera kambio di klima.