NO DUNA SANGURA UN CHENS
Willemstad – Servisio di Salú Públiko di Kòrsou (UO G&GZ ántes GGD) ta pidi atenshon pa e importansia pa eliminá lugánan di brui sangura prinsipalmente awor ku áwaseru ta kayendo.
E sangura ku nos konosé ku strepi blanku ku pretu, esei ta e sangura ku yama Aedes aegypti
i ku ta e sangura ku por pasa e malesa Dengue, Chikungunya i Zika. E sanguranan aki ta biba mei mei di nos si nos mes laga nan. No dun’é un chèns
E sangura di dengue ta pone su webunan prinsipalmente den awa limpi. Un sangura ta biba mas o menos 1 luna. E sangura muhé ta chupa sanger di un hende ku ta malu ku e viro i ta pasa esaki despues di un periodo pa un otro persona salú. Di e manera aki e vironan di e malesanan menshoná ta pasa di hende pa hende via di pik’s di sangura. .
Por a tuma nota ku resientemente diferente isla den Karibe a konfirmá e malesa di dengue, en partikular dengue tipo 2. Manera tur hende sa, tin 4 tipo di dengue.
Si PUEBLO no yuda Servisio di Salú Públiko (G&GZ) kombatí e sangura, esakinan lo plama e malesanan ariba meshoná fasilmente. Pesei nos tur huntu mester tuma akshon pa eliminá fokonan kaminda sangura por brui, paden i rondó di edifisionan sea kas òf negoshi.
Medidanan ku por tuma paden di kas òf edifisio
- Kontrolá pòchi mata ku awa aden i tambe e skoter ku ta fangu awa.
Kiko por hasi ?
Kambia e awa i laba e pòchi kada 7 dia òf basha abate òf BTI den esaki. Den e skòter ku ta fangu awa por pone santu of tera di manera ku e sangura no ta haña rant di awa pa pone su webunan.
Medidanan ku por tuma pafó di kas òf edifisio
- Kontrolá bo kurá di kas pa presensia di tayer, frishidèr, bleki, hèmber, baki di foam, kùp i otro artefaktonan ku no ta wòrdu usá (mas).
Kiko por hasi ?
Paga bon tinu kaminda(nan) ku ta skur i sukú manera bou palu kaminda ku por tin artefaktonan.
- Tira lokual bo no ta usa afó na lèndfil.
- Si ta algu ku no por tira afó, bora esaki den e bòm di manera ku awa no por keda para òf yena esaki ku tera òf santu.
- Kontrolá bo renbak òf baki ku ta fangu awa di áwaseru. E mihó kos ta pa pone piská den e baki òf renbak.
- Si bo ta usa bari òf kontainer pa fangu awa, tapa esakinan òf tira abate òf BTI den esakinan. Pa tapa e bari/kontainer uza tela òf ‘muggengaas’ i mara esaki ku un kabuya pa e sangura no haña buraku pa e drenta i buta webu.
- Kòrda riba e het (goot) na kas ku por tin blachi aden i ta wanta awa. Limpia esaki.
- Berpùt ku ta habrí òf ku skèrnan of buraku, laga sera esakinan hermétikamente. Tambe por flush kerosin den e berput.
- Negoshinan di industria di bendementu di auto segunda mano, kontratistanan, lugánan di benta di flor, i luganan di tayer mester evitá di tin kosnan poné kaminda e artefakto por fangu awa.
Por ehèmpel, tayer ku awa aden ta forma e kaminda perfekto pa sangura pone webu aden. Tayer ta skur i e awa den e tayer tin e temperatura perfekto pa e sangura. Lugánan di tayer mester pone tur tayer bou dak òf tira e tayernan ku no ta uza afó na .
PROTEKSHON NA BO KURPA
- Protehá bo mes kontra piká di sangura dor di hunta bo kurpa ku repelentenan ku ta kontené e kímiko DEET. Por haña esaki ta botika i supermerkadonan.
Sangura ta e yabi pa pasa e malesanan di Dengue, Chikungunya i Zika i tambe Keintura hel (Gelekoorts). Gobièrnu so no por kaba ku sangura. Sangura por keda eliminá si nos eliminá tur kos kaminda sangura por pone webu aden. Hasi bo parti. No dun’é un chèns !!
Pa mas informashon òf pa duna un keho tokante sangura por yama, mail of WhatsApp.
Den kaso ku mester di abate òf BTI por aserká THZ na Zakitó.
Direkshon: Departamentu di Kòntròl di Sangura, Servisio di Salú Públiko (G&GZ)
Piscaderaweg 49, Zakitó
Telefòn: 432-2867
WhatsApp: 527-0854
Email: infogmn@gobiernu.cw
Por sigui GMN su Red nan Sosial i sigui tur desaroyo ku tin di haber ku e trópiko aki i otro tópikonan di relevansia.

