Investigashon relashoná ku sostenibilidad di Klein Kòrsou
Willemstad – Via “Proyekto Klein Curaçao Resembid”, Gobièrnu di Kòrsou aktualmente ta investigando e sostenibilidad di e isla pa determiná limitashonnan i eksperensianan di bishitantenan na e sitio Ramsar aki. Pa determiná esei ta pidi turista i lokalnan ku a bishitá e isla resientemente pa yena un enkuesta. Gobièrnu di Kòrsou tin komo meta pa preservá e status ekológiko di Klein Kòrsou komo un “wetland” Ramsar dor di implementá inisiativanan ambiental ku ta kondusí na uzo responsabel, preservashon di herensia natural i kultural i desaroyo sostenibel. A inisiá e proyekto aki na aprel último i lo dura un aña pa despues nombra un outoridat di maneho pa e isla.
Te ku awe, e Proyekto Klein Curaçao a studia diferente aspekto relashoná ku sostenibilidat. Sitionan di nèshi di turtuga a wòrdu monitòr i a opservá mas ku 50 nèshi durante e temporada aki i ta sperá ku e kantidat aki lo sigui krese. Siman pasá a hasi grabashon di video di rif di koral pa análisis i monitoreo pa ku futuro. Lugánan ku ta wòrdu impaktá pa Sargassum, plèstik i palu ku ta drif den oséano i ta bai pega na Klein Kòrsou tambe a wòrdu evaluá. Opservashon na e faro ya a indiká ku un máksimo di mas o ménos 40 persona pa ora por bishitá e faro aki. Tambe tin indikashon di kiko hende ta konsiderá komo distansia sosial akseptabel durante ku nan ta relahá na e isla.
Siguiente paso ta pa kolektá dato relashoná ku rekreo di turistanan na e isla mediante un enkuesta kual ta tuma mas òf ménos 10 minüt. Pa kada enkuesta yená lo hasi un donashon na Sea Turtle Conservation Curaçao pa sostené nan trabou na Klein Kòrsou. Pa yena e enkuesta por bishitá: http://www.kleincuracao.cw/survey òf via e kódigo QR riba página di Facebook: Ministry of Health, Environment & Nature Curacao. Riba potrètnan por mira Minister di Asuntunan General enkargá ku Agrikultura, Medio Ambiente i Naturalesa señor Gilmar Pisas dirigiendo e reunion relashoná ku e proyekto aki kual a tuma lugá na edifisio di GMN na Colon.
