ARUBA TA YAMA BON BINI NA PRINSES BEATRIX

 

Prome Minister Evelyn Wever-Croes:

 

Den cuadro di e bishita di Prinses Beatrix

ARUBA TA YAMA BON BINI NA PRINSES BEATRIX

 

ORANJESTAD – Diahuebs merdia, Prome Minister Evelyn Wever- Croes hunto cu Gobernador di Aruba, sr. Alfonso Boekhoudt, y sra. Hellen van der Wal di Dutch Caribbean Nature Alliance (DCNA), tabata presente na Aeropuerto Internacional Reina Beatrix, pa duna bon bini na Prinses Beatrix, cu riba invitacion di DCNA, lo ta na Aruba pa un bishita cortico. Durante su bishita, Prinses Beatrix lo asisti na un congreso na Universidad di Aruba, organisa pa DCNA, riba e tema di naturalesa.

 

Riba su propio iniciativa, Prinses Beatrix lo bishita Neptalie Henriquez Park, cu ta un speeltuin cu ta wordo remodela, hunto cu e fundacion Hulandes Jantje Beton. E fundacion aki, tin un iniciativa pa drecha varios speeltuin den e islanan Hulandes den Caribe, y pa e motibo aki, Prinses Beatrix lo bishita e speeltuin pa admira con bunita e ta kedando. Un otro proyecto cu Prinses Beatrix lo bishita durante su estadia cortico, ta telefon pa Hubentud, cu ta un proyecto cu e tin hopi serca di su curason. Telefon pa Hubentud no solamente ta yuda aki na Aruba, pero tambe otro islanan den Caribe.

 

Finalmente, Diabierna mainta, Prinses Beatrix lo ta presente na Universidad di Aruba pa e congreso organisa pa DCNA, riba e tema di naturalesa. Prome Minister a indica, cu aunke e bishita di Prinses Beatrix, no ta uno oficial, nan a dune un caluroso bon bini. “Aruba semper tabata tin un luga special den curason di Prinses Beatrix, y ela indica esaki bisando mi persona cu e ta contento di ta bek na Aruba, pa wak con e isla ta desaroyando despues di un par di aña cu e no a bin mas. Nos ta duna Prinses Beatrix un bon bini na Aruba, y spera cu su bishita cortico na nos dushi isla, ta uno fructifero” Prome Minister a expresa.