Eksitoso inisio di SOAB su seri di “workshop” pa kompartí konosementu ku kliente i komunidat
Eksitoso inisio di SOAB su seri di “workshop” pa kompartí konosementu ku kliente i komunidat
Na kaminda pa selebrashon di 30 aña di konfiansa públiko
WILLEMSTAD — Djamars 21 di novèmber i djárason 22 di novèmber den kompania di un sala yen di profeshonalnan den tur ramo di nos sektor públiko SOAB a duna inisio na su seri di “workshop”. Den luna di òktober 2024, SOAB lo marka 30 aña ta sirbi komunidat komo institushon responsabel pa kontabilidat di finansa públiko i konsehero di konfiansa di Gobièrnu. Komo un parti klave di e aña aniversario aki, SOAB a skohe pa buta énfasis riba kompartí konosementu i duna bèk na komunidat na diferente okashon.
Pa honra e lasonan ku SOAB a sera durante e último 30 añanan, SOAB lo organisá tur luna durante hinter e aña seri di “training”, “workshop” i seminario pa kompartí ekspertisio i eksperensia ku trahadó, kliente i entre otro hóbennan den nos komunidat. Meta di e seshonnan di konosementu aki ta pa partisipantenan tin e oportunidat di konektá i interkambiá ku otro, amplia nan horizonte i krese den sentido personal i profeshonal.
Seshonnan bon risibí i bishitá
Djamars i djárason último e promé seshonnan a ranka sali ku un gran oudiensia. E promé “workshop” riba e tema di “Cybersecurity” tabata dirigí pa Cliantha de Camps i Daniella Genaro di SOAB. Na un manera práktiko a trata e importansia di protehá bo identidat i e mihó manera pa trata ku material i rekursonan online. Orador invitá Daniel Corsen a hiba e mas ku 50 partisipantenan den e mundu di Inteligensia Artifisial, e impakto ku ya kaba esaki tin den nos bida diario i tambe e perspektivanan pa futuro.
Danki pa e konfiansa
SOAB ta invitá tur partner den sektor públiko pa keda pendiente di e diferente seshon i oportunidatnan ku lo sigui riba e trayektoria pa kumpli 30 aña. Pa mas informashon por sigui e página sosial di SOAB òf tuma kontakto via marcom@soab.cw.
