KÒRSOU DURANTE DI KONFERENSHA NA BARCELONA A ASEPTA PA TA SEDE DI E DI XXVI KONFERENSIA DI ZONANAN EKONÓMIKO DI IBEROAMERIKA PA 2024
KÒRSOU DURANTE DI KONFERENSHA NA BARCELONA A ASEPTA PA TA SEDE DI E DI XXVI KONFERENSIA DI ZONANAN EKONÓMIKO DI IBEROAMERIKA PA 2024
Willemstad 26 di novèmber 2023- Minister Sithree van Heydoorn, na nòmber di Minister di Desaroyo Ekonómiko, Ruisandro Cijnje, di forma simbóliko a aseptá pa Kòrsou ta sede di e di XXVII Konferensia di Zonanan Ekonómiko di Iberoamérika na Novèmber 2024. E konferensha di Asosashon di Zonanan Ekonómiko di Amérika (AFZA) ta reuní no ménos ku 500 partisipante, tur, ehekutivonan di zonanan ekonómiko den no ménos ku 25 pais di Latino Amérika i Spaña. Kòrsou, pa medio di Curaçao Industrial i International Trade Development Company N.V. (CURINDE), ku ta miembro di AFZA, a logra di konvensé e organisashon importante den e mundu di zona ekonómiko pa tene su konferensha anual otro aña na Kòrsou. Minister van Heydoorn a aseptá e banderin, komo símbolo di e pais kaminda e konferensha lo tuma lugá próksimo aña, a gradisí i a invitá esnan presente pa tei otro aña na Kòrsou.
Curinde ta miembro di AZFA for di 2016. Zonanan ekonómiko den Latino Amérika i Spaña ta reuní den AZFA. Kada aña AZFA ta tene su reunion anual kaminda ta trata tópikonan di interes komun pa manehadónan di zonanan ekonómiko. Algun di e temanan ku a keda diskutí durante di e último konferensha tabata e.o. reto i oportunidatnan di inteligensha artifisial, e realidat di “Global Minimum Tax” i tambe Ophetivonan di Desaroyo Sostenibel (SDGs = Sustainable Development Goals) loke ta brinda oportunidatnan na paisnan pa krea un mihó nivel di bida na siudadanonan den nan komunidat. E konferensha mes a tuma lugá na DFactory Barcelona, un zona kreá spesialmente pa kompanianan di inovashon ku ta establesé den e zona ekonómiko na Barcelona i ku a keda kombertí den un sentro di inovashon 4.0.
E delegashon di Kòrsou ku a partisipá na e konferensha di AZFA na Barcelona, banda di CURINDE tambe a konsistí di Duana. Promé ku e konferensia a bishitá i sera konosí ku Zona di Aktividatnan Logístiko di e Haf di Barcelona, ku ta e hub logístiko di Barcelona. Tabatin un enkuentro tambe ku representantenan di e Ministerio di Industria, Komèrsio i Turismo na Barcelona, Direktor i Hefe di Ayuntamiento di Barcelona. Tur esaki ku e meta pa eksplorá un posibel koperashon.
Kòrsou, pa medio di CURINDE, awor ta kuminsá hasi e preparashon nesesario pa banda di organisá un konferensha eksitoso tambe ofrese Kòrsou i nos posibilidatnan na e mas di 500 partisipante ku lo tei na e di XXVII Konferensia di Zona Ekonómiko di Iberoamérika.
