RESULTADO DI ELEKSHON REPRESENTANTE DI BÙS, TAKSI I TOERWAGEN

Willemstad  –  Djasabra 25 di novèmber 2023 a tuma lugá elekshon pa yega na komishon ku ta representá Bùs chikí i mediano i komishon pa Taksi.
No tabata nesesario tene elekshon pa komishon di toerwagens komo ku tabatin solamente 1 persona ku a postulá su mes ku sosten di 9 otro doño di pèrmit.

Djaluna atardi, 27 di novèmber último, Komishon di Elekshon ku ta konsistí di hefe i empleadonan di Kranshi a tene un reunion pa ofisialisá e resultado di e elekshonnan. Hefe di Kranshi ta partisipá ku, konforme Artíkulo 5 di Afkondigingsblad 1969 no. 51, ofisialmente e siguiente shofùrnan a keda elegí komo representantenan pa Komishon di Bùs chikí i mediano, pa e Komishon di Taksi i pa e Komishon di Toerwagen 2023.