AKTUALMENTE NA KÒRSOU TA SIRKULÁ INFLUENZA I COVID

Tur dos por pega via di rosea i man sushi:

 

AKTUALMENTE NA KÒRSOU TA SIRKULÁ INFLUENZA I COVID

 

Willemstad – Departamento di Salubridat UO G&Gz (ántes GGD) di Ministerio di Salubridat, Medio Ambiente i Naturalesa ta urgi un i tur tuma nota di e siguiente rekomendashonnan.

 

1. Aktualmente na Kòrsou ta sirkulá Influenza i COVID. Tur dos ta pega via di rosea i man shushi.
2. Serkania di ménos di dos meter i mas largu ku 15 minüt por kousa kontagio. No ta tur hende ta haña síntoma. Pero bo por pega otro ounke abo no tin síntoma.
3. Mester hasi èkstra esfuerso pa no hiba e vírùs serka hende ku imunidat mas frágil, manera grandinan, hendenan ku malesa króniko i hende muhé na estado.
4. Si abo ta sinti malu protehá otronan!

 

Protekshon

Tapaboka ta importante pa disminuí e chèns di pasa e vírùs pa otronan. Esaki ta funshoná manera un filter ku ta fangu vírùsnan ku por ta saliendo for di bo boka i nanishi. Bisti tapaboka ora:

• ta den espasio chikitu i será, entre otro den outo/bus;
• ta den espasio kaminda lo por tin hende malu òf frágil, entre otro den botika, konsultorio di dòkter, hospital, kas di grandinan;
• bo ta bishitá bo grandinan na kas;
• abo ta sinti “fèrkout” bisti un tapaboka ora bo ta hopi serka di hende.
• E tapaboka MESTER tapa for di nanishi te ku kachete, sino e NO ta hasi su trabou.

 

Sirkulashon di airu:

• Den outo purba di uza ménos èrko i mas bentana habrí, asta si ya kaba ta uzando tapaboka;
• Si bo ta bai topa famia/amigu hasi esaki den airu liber òf un lugá ku bon sirkulashon di airu fresku.
• Sòru pa ora ta kuida hende malu, bentananan ta habrí pa airu sirkulá.

 

Higiena:

• Preferibel usa awa i habon pa tene man limpi, ora no por usa esakinan por uza djèl ku alkohòl (mas ku 60%);

 

 

• Man limpi ta importante ora ta kuida hende malu pa abo no pega;
• Man limpi ta importante ba abo no hiba ku trese e vírùs via man shushi pa otronan.

 

Zelftest pa Covid

• Por hasi uzo di un zelftest pa detektá Covid si bo tin síntoma di fèrkout òf malu di barika.
• Zelftest ta optenibel na botika.
• E zelftest por sali negativo e promé dia di síntoma miéntras ku tòg bo tin COVID. Pa sigur ta bon pa ripití e tèst e siguiente dia.

 

Konsultá dòkter na tempu

• Yama e ofisina di bo dòkter di kas mesora ku sa e resultado positivo di e tèst. Den kaso bo bira mas malu e ta na altura kaba i por evaluá i guia e situashon mihó.
• No tarda pa yama un médiko ora e persona kuminsá sinti mas malu.

 

Ta nos kada un su responsabilidat di protehá nos mes, nos famia, nos sernan kerí, koleganan i nos komunidat kompletu. Pa ta bon informá tur momentu like i sigui nos riba nos página di facebook Ministry of Health, Environment and Nature. I otro plataformanan sosial di GMN