RDK I PDVSA TA FIRMA SETTLEMENT AGREEMENT

Partidonan a yega na otro despues di un periodo largu di negosashon
RDK I PDVSA TA FIRMA SETTLEMENT AGREEMENT

Willemstad, 19 di desèmber 2023 – Riba djamars 19 di desèmber Refineria di Kòrsou (RdK) i Petróleos de Venezuela S.A. (PDVSA) a firma un ‘Settlement Agreement’, den kua a fiha un akuerdo kaminda ta interkambiá krudo pa e debe habrí ainda na Kòrsou. Ku esaki a marka un momentu signifikante den e proseso ku RdK i PDVSA a enkaminá e último añanan, entre otro den korte di arbitrahe i finalmente riba un manera amikal na mesa di negosashon.

Durante un seremonia ofishal ku a tuma lugá den e edifisio na Pletterijweg na Kòrsou, CEO di RdK sr. Patrick Newton, Vicepresidente de Exploración y Producción de PDVSA y Presidente de la Corporación Venezolana de Petróleo (CVP) sr. Luis Enrique Molina Duque i Ministro del Poder Popular de Pétroleo y Presidente de Petróleos de Venezuela, S.A. (PDVSA), sr. Pedro Rafael Tellechea Ruiz bou di supervishon di Minister Presidènt di Kòrsou sr. Gilmar Pisas, a firma e Settlement Agreement. Den desèmber 2021, bou di guia di direkto di RdK sr. Patrick Newton, a inisiá e inisiativa pa ekstendé un proposishon di kolaborashon pa asina yega na un akuerdo. Despues ku partidonan a enfrentá otro den korte di arbitrahe na Suisa na yanüari último, ambos a disidí pa negoshá na mesa pa huntu yega na un akuerdo den bon kolaborashon. Na mes momentu, RdK a realisá e trámitenan nesesario ku Office of Foreign Assets Contro (OFAC) pa sigurá ku no opstante desaroyonan mundial, sanshonnan òf kualke otro sirkunstansha, RdK por keda sigurá ku e lo risibí e krudo ku e por prosesá i bende riba merkado.

E paso aki ta unu ku ta trese kambio signifikante den e relashon stratégiko entre RdK i PDVSA, ku ta un relashon di más ku 30 aña. Por papia di konfiansa i un relashon mehorá atrobe, kual ta di gran nifikashon. Alabes e kolaborashon i importashon di krudo ta krea mas operashon i aktividat di barku den haf kual ekonómikamente ta benefisiá Kòrsou.