SOAB ta regalá mucha i hóbennan un fin di aña spesial

WILLEMSTAD — SOAB tabatin e gran plaser pa sostené Federatie Antilliaanse Jeugdzorg (FAJ), Skol Alablanka i Soeur Hedwigschool pa asina realisá un tremendo selebrashon di fin di aña. Komo parti di su responsabilidat sosial, SOAB ta kere firmemente den traha huntu ku inisiativanan ku ta fortifiká konosementu, kultivá talento i krea oportunidatnan pa esnan ku ta den mas nesesidat.

 

Un grupo di empleado di SOAB a uni forsa pa hasi e eventonan aki memorabel pa tur e mucha i hóbennan, kual por a mira den e diferente momentunan di alegria i karanan kontentu. Soeur Hedwigschool a bin di bishita serka SOAB i e sala di reunion a keda transformá di tal forma ku e alumnonan por a disfrutá di nan sena di Pasku .

 

FAJ a skohe pa trit su hóbennan un selebrashon di Pasku na un lokalidat pafó di esfera di skol kaminda e hóbennan por a disfruta na nan antóho. Skol Alablanka a trese e ambiente di Pasku na nan skol na Barber, pa klousurá aña 2023 ku tur alumno. Dianan di fiesta ta dianan ku un i tur, grandi i chikí mester por sinti e esfera di union, sosten i alegria unda ku por ta.

 

Mas aya ku e trabou prinsipal ku SOAB ta hasi pa gobièrnu i sektor públiko, SOAB ta dediká na kontribuí na bienestar i desaroyo di e komunidatnan ku e ta aktivo aden. E programa di responsabilidat sosial: “we know, we serve, we care” ta para pa e diferente maneranan ku SOAB ta embolbí pa duna bèk na komunidat. SOAB ta keda na altura di nesesidatnan ku ta biba den komunidat i ta aportá ku konosementu, ta komprometé pa sirbi komunidat komo parti di su trabou i ta dediká na kontribuí na adelanto di nos komunidat.

 

SOAB kier yama e organisashonnan partisipante danki pa e konfiansa i alabes deseá komunidat di Kòrsou  felis dianan di fiesta. Ku e dianan benidero ta yená ku alegría i goso den kada hogar.