Relashoná ku e aksidente di tráfiko ‘hit & run’
Kralendijk Bonaire
Relashoná ku e aksidente di tráfiko ‘hit & run’ ku a tuma lugá riba djasabra 30 di desèmber 2023, alrededor di 10.45 or di anochi riba Kaya Amsterdam, polis ta pidi yudansa di komunidat.
Riba e dia aki un vehíkulo a alkansá un siklista i a siguí kore. Polis a kuminsá un investigashon inmediatamente i ta hasi yamada na e shofùr pa medio di e komunikado aki pa bin mèldu su mes na warda di polis.
E investigashon a demostrá ku durante di e aksidente posiblemente un pikòp koló shinishi di marka Mitsubishi tabata enbolbí. Kuerpo Polisial Hulanda Karibense ta pidi shofùr di e vehíkulo aki ku urgensia pa mèldu su mes na warda di polis di Boneiru, na Kaya Libertador Simon Bolivar #4.
Ademas polis ta supliká kualke persona ku por a mira, tende òf tin informashon tokante e kaso ariba menshoná pa tuma kontakto ku polis via 715 8000 of via di e number di tep anónimo 9310.

