Assuria ta establesé na Kòrsou
Assuria ta establesé na Kòrsou
Willemstad 18 di yanüari 2024
Assuria, un kompania lider riba tereno di seguro tin plaser di anunsiá ku el a establesé su servisionan na Kòrsou, komo parti di su ekpanshon den e area di Karibe. Assuria ta ofresé un alternativa prometedó pa e merkado di seguro di Kòrsou ku un enfoke riba produktonan inovativo i un servisio konfiabel i efisiente
No solamente na Sürnam Assuria a krese enormemente, pero den Karibe tambe nan tin logronan ku resultadonan finansiero ekselente. Na 1991 NEN, de Nationale i ENNA a uni i asina a lanta Assuria. El a bira e kompania di seguro di mas grandi na Sürnam. Ku un historia originá for di 1889 i un reputashon espléndido komo kompania ku ta brinda seguro general i di bida i penshun.
Ultimo añanan Assuria, komo negoshi ISO sertifiká, a hasi su posishon den region mas fuerte komo ku den 2013 i 2015 nan a tuma enkargo di dos kompania di seguro di Trinidad, entre otro Gulf insurance Ltd. ku no solamente ta aktivo na Trinidad pero tambe na 6 otro isla den Karibe, manera Sint Maarten. Na 2012 Assuria a amplia nan base den region ku un kompania di Seguro General i di Bida na Guyana. Entre tantu Assuria a logra un posishon lider den merkado di Guyana.
E motor tras di Assuria ta su vishon; ‘ esta di ta un instituto Karibense finansiero ku ta enfoká riba hende i ku ta ofresé solushonnan di seguro konfiabel, inovativo i fásil asesibel pa protehá loke ta importante pa bo, fundá riba un base sigur i sólido’ .
Resultadonan finansiero di Assuria ta demostrá ku e vishon aki ta bon respaldá.
E aktivanan total den 2022 tabata US$ 432 miyon i pa medio 2023 US$ 451 miyon. E benta total na 2022 tabata US$ 110.5 miyon ku un ganashi, promé ku belasting, di kasi US$21 miyon. Pa medio di 2023, benta total tabata US$ 54.0 miyon ku un ganashi, promé ku belasting, di US$ 9.3 miyon. Riba e ratio di solvabilidat tambe Assuria ta skor hopi bon. Na Sürnam e ta 164% (eksigensha ta 100%), na Guyana 543% (eksigensha ta 200%) i na Trinidad e ta 225% kaminda ta eksihí 150%.
Assuria ta distinguí su mes dor di tin un repartishon saludabel di su akshonistanan. VSH United Suriname (VHS) tin 24% di akshon i e sobrá 76% di akshonnan ta repartí entre fondonan di penshun, bankonan, negoshinan, empleadonan di Assuria i otro akshonistanan chikí manera invershonistanan individual. VSH ta e úniko akshonista ku tin un interes mas grandi ku 10%. Sin influensha dominante di akshonistanan individual, e empresa tin e libertat pa enfoká riba servisio di seguro di kalidat haltu i representá interes di su klientenan i e interes kolektivo di sobrá ‘stakeholder’.
Tur hende por bira akshonista dor di kumpra akshon den Assuria riba bolsa di Sürnam.
Un otro faktor ku ta kontribuí na e éksito di Assuria ta e tim di maneho bon kalifiká i eksperenshá, dirigí pa Group CEO, Mario R. Merhai MSc AAG. E gerensha tin amplio ekperensha loke ta hisa e konfiabilidat i stabilidat di e kompaniá. Integridat ta un balor sentral die grupo. Den e siguiente komunikado aki 2 siman, lo amplia mas.
Assuria lo kuminsá operá na Kòrsou ku atkisishon di e kompania di seguro Sagicor. Banko Sentral di Kòrsou & Sint Maarten i Banko Sentral di Sürnam a duna pèrmit pa kuminsá ku e proseso di traspaso teniendo kuenta ku reglanan lokal vigente. Derechi di tur asegurado ta garantisá i sigurá. Assuria ta spera di kuminsá operá ofisialmente na Kòrsou na medio aprel.
