KOMUNIKADO DI PRENSA                                   

030/2024

 21 yanüari 2024

Tèstnan pa polis aspirante ta bai kuminsá

 

Despues ku den e último lunanan di aña 2023 tabatin posibilidat pa solisitá pa e funshon di polis aspirante, a sera e siklo di solisitut aki por lo pronto i entrante dia 24 di yanüari awor, esnan selektá ta bai kuminsá ku nan promé tèst.

Durante di e promé tèst aki ta bai wak e kondishon físiko di e kandidato (‘Fysiek Motorisch Onderzoek’).

Tur kandidato mester presentá riba e dia i orario konforme di nan invitashon i mester reservá mitar dia pa e tèst aki.

Un súplika ta bai pa yega na tempu, pasobra for di einan ta kuminsá midi e interés i disiplina di kada kandidato pa e trabou polisial.

Alabes nos ta pidi pa presentá ku un identifikashon bálido.

Manera ya indiká den e invitashon, bo mester bisti un T-shirt koló blanku, karson kòrtiku pa hasi deporte i sapatu di deporte (kèts).

 

Unda ta mèldu?

Kandidatonan mester mèldu na e ofisina di polis prinsipal riba Winston Churchillweg, pegá ku kazèrne di brantwer na Rio Canario.

Si bo ta bini ku vehíkulo, stashoná esaki riba e luga di stashoná outo dilanti di e edifisio i kana bai mèldu na e kasita di seguridat (portietshuisje) na parti nòrt di e edifisio prinsipal.

Einan lo bo risibí mas instrukshon.

 

Kiko ta sigui despues?

Asina ku bo kaba di pasa e tèst, lo informá bo di e resultado. Den kaso ku bo a pas’é ku éksito, bo siguiente tèst lo bira esun di inteligensia i Hulandes (‘Cognitieve- en Capaciteitenonderzoek’).

E tèst aki ta kuminsá dia 26 di yanüari 2024 i lo bo risibí su resultado denter di un (1) siman.

Pa e tèst aki tambe bo mester reservá mitar dia.

Despues di esei, si bo a pasa e tambe ku éksito, nos lo sigui informá bo via di bo portaal, kua ta e tèstnan ku lo sigui.

 

Nos ke animá tur kandidato pa wak e tèst di F.M.O. riba Youtube.

Bo ta bai riba FYSIEK MOTORISCH ONDERZOEK KORPS POLITIE CURAÇAO i asina haña un bista di tur e partinan di kua e tèst ta konsistí.

 

Finalmente nos ta deseá éksito na tur kandidato.