Minister di Hustisia I Polis di Sürnam i Minister di Relashonnan Eksterior, Komersio & Koperashon Internashonal di Sürnam, a bishita Presidente di Parlamento.

Djamars 23 di yanüari 2024, Presidente di Parlamento sra. Charetti America-Francisca a risibí Minister di Hustisia I Polis di Sürnam, sr. Kenneth Amoksi i Minister di Relashonnan Eksterior, Komersio & Koperashon Internashonal di Sürnam, sr Albert Ramdin.

Ámbos minister a enfatisá e balor di koperashon entre e paisnan Sürnam i Kòrsou riba vários tereno. E koperashon aki tin un balor agregá pa ámbos partido.

Tantu Sürnam i Kòrsou konosé retonan similar i den e kuadro ei tur dos pais por siña di otro i oumentá e kapasidat pa traha riba e vários retonan.

Segun minister Hustisia I Polis, sr. Amoksi, na Sürnam tin hopi nesesidat di revishon di leinan i e minister tin un plan di ehekushon konkreto pa forma empleadonan públiko den e área aki. Miéntras ku minister Ramdin di Relashonnan Eksterior, Komersio & Koperashon Internashonal di Sürnam a splika ku e ta trahando mas i mas riba fortifikashon di e relashonnan entre e paisnan. Tin hopi área di komersio for di kua por saka benefisio i ta e intenshon pa organisá mishonnan komersial pa eksplorá e posibilidatnan.