INSTITUTO NASHONAL DI IDIOMA CURAÇAO (INIC)
MINISTERIO KONSERNÍ ENSEÑANSA, SIENSIA, KULTURA & DEPORTE
INSTITUTO NASHONAL DI IDIOMA CURAÇAO (INIC)
PUBLIKÁ RIBA 31 YANÜARI 2024
Entrega di statuto i lansamentu di wèpsait di Instituto Nashonal di Idioma Curaçao
Willemstad – Trinta di yanüari a hasi entrega ofisial di e statutonan di Instituto Nashonal di Idioma Curaçao (INIC) ku a keda firmá resientemente, na Minister di Enseñansa, Siensia, Kultura i Deporte señor Sithree van Heydoorn. Esaki ta marka un paso importante den desaroyo di INIC komo e instituto pa promové rikesa di idioma na Kòrsou. Na entrega di e statutonan Señora Dijkhoff, direktor di INIC, a duna splikashon di e vishon, mishon i rumbo ku INIC ta bai sigui.
Tokante Instituto Nashonal di Idioma Curaçao (INIC)
INIC tin komo meta promoshon, konservashon i desaroyo di rikesa di idioma na Kòrsou. E fundashon ke konektá aktividatnan relashoná ku e idiomanan ku ta mas papiá riba e isla i e ke tin un ròl sentral pa promové bon uso di idioma i alsa abilidatnan di idioma den i pafó di enseñansa.
Ku firmamentu di e statutonan a fortifiká fundeshi hurídiko di e fundashon i esaki ta forma un base sólido pa aktividatnan dediká na ehekushon di maneho di idioma di gobièrnu manera fihá den e plan di maneho nashonal “Na kaminda pa Ko-eksistensia Multilingual”. Dr. Marta Dijkhoff a enfatisá importansia di e paso akí den desaroyo di INIC i e ròl ku e lo tin pa fortalesé uso di e kuater idiomanan mas papiá riba e isla.
Durante su presentashon Minister a enfatisá importansia di maneho di idioma den enseñansa i promoshon di diversidat di idioma riba nos isla.Minister Sithree van Heydoorn a ekspresá ademas su apresio pa esfuersonan di e presidente, señor G. Statie i di e otro miembronan di e Hunta di Komisario. Personal di INIC tambe a haña un elogio pa nan esfuerso i dedikashon durante e transishon di FMS/FPI pa INIC. Finalmente el a enfatisá importansia di diversidat di idioma den konteksto di formashon di identidat i desaroyo kultural na Kòrsou.
Durante e seremonia akí a lansa wèpsait di INIC. E wèpsait www.nticuraçao.org ta aksesibel awor pa pueblo en general i ta duna informashon detayá tokante mishon, vishon, meta i aktividatnan di NTIC. E ta sirbi tambe komo un plataforma sentral pa informashon di fuentenan edukativo i pa notisia al dia relashoná ku e kuater idiomanan.
Señora Dijkhoff a gradisí tur esnan ku a koperá pa logra e meta akí i a enfatisá ku INIC ke konta ku sosten di un i tur i ku nan lo traha ku dedikashon pa fortifiká abilidatnan di idioma i multilingualismo na Kòrsou.
Por lo tanto sigui nos na www.nticuraçao.org pa mas informashon. Pa mas potrèt por bishitá: Instituto Nashonal di Idioma Curaçao