Lei di Kalidat di Airu a wòrdu entregá na Parlamento pa keda tratá
Lei di Kalidat di Airu a wòrdu entregá na Parlamento pa keda tratá
Willemstad – Durante e siman di tratamentu di presupuesto gobièrnu den persona di Minister di Salubridat, Medio Ambiente i Naturalesa, señor Javier Silvania i Minister di Asuntunan General enkargá ku naturalesa i medio ambiente señor Gilmar Pisas a hasi entrega di e konsepto di Lei di kalidat di airu (hinderverordening), na Presidente di Parlamento señora Charetti America.
Manera ya ta konosí riba 19 jüli 2022 Korte di Promé Instansia a dikta ku e areglo ministerial di 2020 den kual gobièrnu a stipulá norma pa kalidat di airu no ta sufisiente pa protehá e komunidat. Korte a dikta ku mester tene kuenta ku e normanan ku WHO ta konsehá i tambe ku e normanan mester ta stipulá den un lei i no den un dekreto ministerial.
Kabinete Pisas II mirando e responsabilidat ku gobièrnu tin pa ku e kuido di salubridat públiko (lesa artíkulo 24 i 25 di nos reglo di Estado)1 i e importansia pa sòru pa krea un base sólido pa kompanianan grandi por hasi negoshi den nos komunidat a sondea i buska e mihó opshon pa regla e normanan promé ku e desishon final di Korte a kai. E solushon de inmediato tabata pa bini ku un lei ku ta protehá hinter e komunidat, kaminda ku empresanan ta mará na pèrmitnan (vergunning) i alabes un lei kaminda ku por kontrolá, konsehá i multa kompanianan ku falta ku e reglanan stipulá. E eskoho a kai pa trese e kambionan nesesario den e Lei di Molèster (esta e Hinderverordening). Ya ora e desishon di Korte tabata konosí tabata sa kaba e rumbo ku mester kana i awe por bolbe anunsiá ku Kabinete Pisas II ta goberná i antisipá riba desaroyonan na bienestar di komunidat.
A pesar ku un trayekto di lei por dura años, gobiernu a perkura pa, konsentrá e energia i tempu di e aparato públiko pa hasi kosnan bira realidat. Den apenas 1 aña i mei a logra kaba e konsepto di lei aki. Mester menshoná ku pa e konsepto di lei aki a konsultá ku 3 diferente gremio (interesadónan, empresanan i e aparato públiko enkargá ku inspekshon). E prosedura ku a enkaminá ta unu ku no den tur kaso ta aplikabel, pero nos a hasi’é pasobra esaki ta unu di e tipo di leinan ku mester karga aprobashon di un i tur pa e tin eksito. Aparte di e konsulta mester bisa ku nos a bai tambe e ronda di konsulta serka nos kolegionan estatal kual ta Raad van Advies i tambe SER. Ambos olegio a duna un konseho positivo riba e lei. Esaki a kondusí na e echo ku por a entregá e lei na Parlamento.
Algun punto kardinal ku e lei aki ta trata ta:
1. Introdukshon di normanan general pa kalidat di airu na Kòrsou. Den e lei ta duna un deskripshon di tur e tipo di materialnan den airu ku ta wòrdu midí i tambe e normanan ku gobièrnu ta stipulá;
2. E normanan pa kalidat di airu ta bai forma parti di e investigashon ku ta wòrdu hasí ora ku ta otorgá pèrmit di molèster (hindervergunning);
3. Ta bai bini un lei mas ku ta bai stipulá e eksigensianan pa loke ta emishon (pues loke ta visibel ku ta sali for di pipanan di fábrika òf otro aktividat ku ta kousa molèster);
4. Ta bai hasi posibel pa por adaptá e leges mas fleksibel;
5. Ta bai adaptá e Lei di Molèster i e Lei di Inspekshon di salubridat pa aktualisá esakinan i hasi ku ta bira mas fásil pa aktua ora esei ta nesesario;
6. E kategoria di multa tambe ta wòrdu oumentá.
Riba potrèt por mira momentu ku Minister di GMN señor Javier Silvania i Minister di Asuntunan General enkargá ku naturalesa i medio ambiente señor Gilmar Pisas ta hasi entrega di e konsepto di lei na Presidente di Parlamento señora Charetti America- Francisca.

