CURINDE TA TENE EKSITOSO MASTER CLASS ELEGANSIA DI BO IMAGEN PROFESHONAL KU VLADIMIL JIMÉNEZ
Willemstad 4 di Februari 2024- Bon maneho di bo marka personal ta parti importante di un hende eksitoso. Resientemente Curaçao Industrial and International Trade Development Company (CURINDE) a ouspisiá un Master Class fasilitá pa e eksperto internashonal Vladimil Jiménez, ku a profundisá netamente den e elementonan ku ta esensial i ku ta determiná éksito di un imagen profeshonal. E Master Class aki a keda inougurá pa Minister di Desaroyo Ekonómiko, Sr. Ruisandro Cijntje. E invitadonan ku a asistí na e evento a haña un bista bon kla di e materia i kon esaki por kontribuí na engrandesé nan imagen profeshonal. E presentashon i interkambio despues di e presentashon a konkluí, entre esnan presente, ku tin un base i kompromiso pa prepará un grupo di hóben lokal i brinda nan un futuro den produkshon di nan propio liña di chacabana (wayabera). Aparte di Minister Cijntje, tambe e Master Class a konta ku partisipashon di Minister Cooper, Minister van Heydoorn, Minister Plenipotensiario na Hulanda, Sr. Manuel i tambe Visekònsùl di Repúblika Dominikana, Sr. Roberto Ibarra.
Minister Cijntje a bisa na apertura di e Master Class “Durante di e último konferensha di Asociación de Zonas Francas de las Américas, nos a será konosi ku Vladimil Jiménez. Ku e eksperensia di Vladimil den produkshon di chacabanas, mi ta konvensí ku Kòrsou por habri su portanan pa risibí e marka Calpo aki na Kòrsou. Mi deseo ta pa e por prepará hóbennan ku ke siña traha chacabana di kalidat ekselente i ken sa ku por keda eksportá pa otro paisnan den mundu.”
E eksperto Vladimil Jiménez Vargas ta propietario di Calpo Atelier na Repúblika Dominicana. E ta un fashionista entusiasmá ku e pashon di bisti bon. El a gradua na O&M University. E tin un spesialisashon den konseho di imagen i estilista artístiko di e prestigioso Chavón Santo Domingo Fashion School. Banda di esaki e ta graduá den computer science, i ta traha na radio i televishon komo presentadó. E tin un diploma den Neurosales, Managerial Leadership, Imagen profeshonal i Senior Management. E ta e host di siguimentu di moda den e programa “Buenos Días con Jesús Nova” i ta partisipá frekuentemente den eventonan di moda internashonal banda di bisti varios selebridat.
CURINDE di e forma aki ta spera di a kontribuí na no únikamente na amplia konosementu di esnan ku a asistí na e evento, pero tambe pa esaki kontagiá komunidat mas pa huntu nos brinda un imagen ekselente. Esaki tabata bon oportunidat tambe pa Calpo Atelier inventarisá huntu ku komersiantenan lokal posibilidatnan pa komèrsio pa medio di nos Zona Ekonómiko.




