A senalá Pèchi Portugues na playa di Kenepa grandi i chikí
Komo tin kambio di direkshon di bientu òf koriente di laman,
A senalá Pèchi Portugues na playa di Kenepa grandi i chikí
Willemstad – Ministero di Salubridat, Medio Ambiente i Naturalesa ta partisipá ku kolaboradónan di GMN durante nan kontròl a señalá Pèchi Portugues na playa di Kenepa Grandi i Chikí. Ta konsehá personanan ku ta bishitá playanan na parti sùit òf den área di Banda Bou e dianan aki pa paga bon tinu. No ta nada straño ku a deskubrí Pèchi Portugues mirando e echo ku Ministerio di GMN a informá kaba durante dianan ku a pasa ku un kambio di direkshon di bientu òf kambio di koriente di laman a trese organismonan ku ta drif den laman direkshon di nos kosta.
Pèchi Portugues ta relativamente fásil pa mira den laman. Bo ta rekonosé na su forma di un blas òf saku di plèstik lilá yená ku airu di mas òf ménos 25 sentimeter i ta drif den laman. Si bo mir’é, keda leu, su tentakulonan bou di laman por alkansá 15 meter. Si bo bini den kontakto ku su tentakulonan, kita restante di tentakulo ku keda riba bo kueru sin grawat’é, laba e kueru ku awa di laman i apliká awa lou riba e área afektá. Tambe por apliká binager regular slap (1 pa 2 dòpi den 2 liter di awa) riba e área afektá. Si e área afektá keda kima òf hasi doló intenso, pone eis riba dje i bishitá bo dòkter di kas.
Riba potrèt, Pèchi Portugues ku ta drif den laman.
Riba potrèt, un slòf pa kompará su grandura ku esun di un Pèchi Portugues.
Riba potrèt, por mira e parti di e Pèchi Portugues ku semper ta keda bou di laman i ku por alkansá un largura di 15 meter.
