Banco di Caribe ku donashon n’e proyekto

‘Kas di Kultivashon’ di Skol Myrna Dovale

 

WILLEMSTAD: Resientemente Banco di Caribe  a hasi un bishita na Skol Myrna Dovale, esaki den kuadro di un donashon na okashon di 50 aniversario di Banco di Caribe. E donashon aki ta spesífikamente pa konstrukshon di un kas di kultivashon.

 

Tokante e proyekto; Kas di Kultivashon

Skol Myrna Dovale ta e úniko skol ku ta brinda enseñansa na muchanan ku tin outismo i muchanan ku limitashon di oido òf abla. Algun tempu pasá e skol a muda pa un sitio nobo di manera ku nan por kontinuá ku e restrukturashon di nan programa. Un di e aspektonan krusial den e programa ta lèsnan práktiko manera agrikultura, ku ta yuda prepará e alumno mas mihó. Mirando ku alumnonan di e skol tin un nesesidat spesial, kada método adishonal ku ta yuda sostené nan edukashon ta un bon inisiativa. E kas di kultivashon ta un bon adishon, pa motibu ku plantashon ta un manera ideal pa stimulá kreatividat, pasenshi i responsabilidat, esaki debí ku e proseso ta rekerí hopi atenshon i kuido pa por mira resultado. Adishonalmente e muchanan ta siña planta diferente fruta, bèrdura i yerba ku nan por usa pa prepará diferente plato den kushina di e skol mes.

 

Banco di Caribe ta aploudí e proyekto di Skol Myrna Dovale i ta sigur ku e alumnonan lo benefisiá di e kas di kultivashon. Plantashon ta un aktividat ku lo yuda sostené e kuríkulo di e skol i ta ampliá konosementu i pèrkurá pa desaroyo di e mucha. Direktor di Banco di Caribe,  sr. Eduardo (Dito) A. de Kort, a bishitá Skol Myrna Dovale pa risibí mas informashon di e proyekto i su planifikashon.  Komo símbolo di e kontribushon di Banco di Caribe, Sr. de Kort a opsekiá e direktora, sra. Arginia Lucio, i alumnonan un mata di lamunchi pa nan planta na momento ku finalisá e kas di kultivashon. Banco di Caribe lo sigui e proyekto aki di serka pa mira e resultado i kon e konosementu di e muchanan ta krese pareu ku kada mata ku nan planta.

 

—

Riba fotonan athunto e bishita di Banco di Caribe na Skol Myrna Dovale.