Mester evitá “brain drain” i tene inteligensia lokal na Kòrsou

Presidente di Trabou Pa Kòrsou Jonathan Symor

 

 

                Mester evitá “brain drain” i tene inteligensia lokal na Kòrsou

               DUO mester hasi kambio na su forma di kobra. Ta kreando pobresa.

 

Trabou Pa Kòrsou kada bes ta hañ’é ku eks studiante nan ku a kaba òf no a kaba nan estudia ku éxito, ku un problema similar. E problema aki yama “Dienst Uitvoerings Onderwijs”, esta DOU.

DUO ta e instituto ku ta duna finansiamentu di estudionan, na studiante nan ku no ta biba na hulanda, finansiamentu di estudio den reino. Pero na luga di a yuda e studiante nan, esaki a para bira un kastigu pa e studiante nan aki. Pa hopi tempu kaba a yega di papia riba esaki. Pero nunka no a bini ku un ayudo konkreto pa e (eks) studiante nan aki. Tin algun eks studiante di SSC ku tambe tin e problema aki. E intenshon di duna finansiamentu pa estudio ta bon na promé instante, pero praktika ta demostra ku e por limitá un studiante di siguí studia den futuro. Por ehèmpel si e studiante nan aki a studia pa ún periodo largu o asta ora e kaba di

studia, ahinda esaki ta stroba e èks studiante.

 

Na promé luga studiante nan a bira mas konsiente di kon largu i kuantu debe nan lo kreá si nan studia un periodo largu. Esaki ta pone ku mas lihé nan haña un diploma, mas lihé nan lo ke kuminsa traha i no ta sigui studia i alkansá nan potenshal kompletu. Pa esunan ku disidí di hasi un estudio largu, lo terminá ku un debe astronomikamente haltu. Esaki ta pone ku nan lo no por hasi ningun fiansa of hipoteka después di nan estudio. Anto esunan ku hasi un estudio kòrtiku lo mester dependé di suerte di haña un trabòu kaminda tin bon kondishon pa empleado manera: subida di salario o otro eksigensianan sekundario pa e por siguí krese mientras nan edat ta keda subi.

 

TPK ta di opinión ku mester kuminsa pone salario nan di inisio figo ku ta kuadra ku e nivel di estudio i mara esaki na insentivo fiskal na benefisio pa e doño di trabòu. Meskos ku tin un salario mínimo, mester tin un salario ku e studiante lo wòrdu pagá segun su nivel di estudio. Tambe TPK ta pensa di bini ku un pago figo pa luna ora di paga bèk, ku lo no surpasá 450 florin. Naturalmente dependé di e salario ku ta gana. Esaki ta pa duna e eks studiante un rosea ku e por hasi un fiansa of hipoteka. Basikamente kontinuá ku su bida i formá un famia. E forma ku ta kobra, pero no ta tene kuenta ku no ta paga e eks studiante na balor di loke e a studia, no ta bon. Nos ta alimentando pobresa.

Durante tratamentu di presupuesto pa aña 2024 di país Kòrsou den siman di tumba, TPK mustrando e prekupashon pa tur e (eks) studiante nan, nos lider Sr. Rennox Calmes a hasi pregunta na Minister Presidente i Minister Finansa, kiko DOU lo por hasi pa juda (eks) studiante nan. TPK a risibí kontesta finalmente di minister di enseñansa ku DOU lo habri un loket na Kòrsou i lo kambia e manera agresivo ku nan ta kobrando awor aki.

 

Den yanüari 2024 e redaktor hulandes, Tom Veenstra di oogtv.nl a hasi un publikashon 15 di yanüari 2024, ku DOU a regala 1.3 miljard euro na eks studiante nan. Kada studiante a haña un montante di rebaho riba nan debe.

Na Merka, Presidente Biden a anunsiá kanselashon di debe di aproksimadamente 74.000 studiante na un suma di 5 biyon dollar sigun e revista Internashonal Rueters di yanüari 2024 dor di Andrea Shalal.

 

Na momentu ku restruktura finansiamentu di studio, ku kiko e ta yuda Kòrsou?

1. E kondishon nan ta stimulá studiante nan regresá Kòrsou
2. Kada studiante lo por hasi un invershon grandi ora nan kaba di studia, p.e: outo, kas o inverti den lanta propio negoshi.
3. Manera di paga ta mas flexibel, dus ta pone ku mas studiante lo ke keda Kòrsou paso e sèn ta yega awor si.
4. Mas studiante keda Kòrsou, ta nifiká ku bo inteligensia di relevo lo krese pareu ku e desaroyo di e pais. Asina ta evita “ brain drain”
5. Tambe lo e kontribuí den grandi na formashon patriotiko.
6. Hasiendo estudio mas pagabel ta kontribuí ku importá inteligensia.
7. Mas hende na trabòu ta kontribuí na fondo di SVB, fondo di AOV, forsa di kompra i OB.

Enseñansa gratituo/ pagabel ta un parti fundamental di derecho nan humano i ta e método prinsipal di desaroyo sosial i ekonómiko. Hasiendo enseñansa asesibel pa tur hende, sin tené kuenta ku e parti finansiero, nos lo krea un sosiedat mas balansá e inklusivo. Enseñansa gratituo/ pagabel tambe lo por yuda kibra e sirkulo visioso di pobresa i empodera individuo yega nan maksimo potenshal den bida. Adishonalmente un poblashon eduká ta kontribuí na un sektor laboral ku mas profeshonalismo i efisiensia tresiendo mas inovashon i kresementu ekonómiko.

 

TPK sa ku Kòrsou no ta meskos ku diferente paísnan ‘super’ desaroya, pero si ta di opinión ku mester traha duru i hasi e kambionan nesesario pa yega einan. Pa basta aña nan kaba studiante nan spesialmente di DUO tin problema pa biba fleksibel. Awor si ta momentu di bini ku alternativanan realistiko ku por kambia e problematika di finansiamentu di studio.

Sr. Jonathan Symor