Delegashon di Parlamento a haña un presentashon i informashon adishonal riba e maneho nobo di vivienda “Mi Casa Ya” na e Ministerio di Vivienda, Ciudad y Territorio de Colombia.
Delegashon di Parlamento a haña un presentashon i informashon adishonal riba e maneho nobo di vivienda “Mi Casa Ya” na e Ministerio di Vivienda, Ciudad y Territorio de Colombia.
Bogota, djamars 5 di mart 2024, parti mainta e delegashon di Parlamento na Bogota a hasi un bishita na e Ministerio di Vivienda, Ciudad y Territorio de Colombia. Akinan e delegashon a reuní ku e Minister di Vivienda, sra. Catalina Velasco, i alabes e eks Minister di Vivienda, sr. Luis Felipe Henao, bou di kende e proyekto di vivienda “Mi Casa Ya” a originá. Minister Velasco tabata kompañá pa diferente funshonario haltu den e sektor di vivienda manera e Direktor de Fonvienda i Direktor de Asuntos internacionales de vivienda.
E delegashon di Kòrsou a haña un presentashon i informashon adishonal di tantu e Minister i e eks Minister di Vivienda riba e maneho nobo di vivienda “Mi Casa Ya” ku ya tin masoménos nuebe aña kaba den práktika na Colombia. E tabata un mainta úniko i sumamente interesante mirando e echo ku no ta usual ku bo ta mira dos minister di diferente partido i diferente tempu huntu den un sala pa duna informashon na un delegashon di Parlamentario. Tambe tabata interesante pa mira kon esun Minister a inisiá e trayekto i e otro a sigui kuné purbando na mehorá esaki a base di e eksperensianan atkerí durante e añanan ku a transkurí. Gobièrnu kolombiano a hisa e tópiko di kas propio pa su siudadanonan na nivel di estado i a sigui kuné, paso e la resultá di ta un proyekto sumamente eksitoso. Durante e presentashon e miembronan di Parlamento por a hasi e diferente preguntanan ku nan tabatin.
Sr. Henao ta splika ku tur kos a start ku e pensamentu di kambia polítika di oferta, den un di demanda. Esaki ta lokual e eks Minister di Vivienda i aktual CEO di Aso bancaria, sr. Jonathan Malagón, tambe a enfatisá durante su presentashon duná na e delegashon di Kòrsou. Ademas anteriormente tabatin e problema grandi ku proyektonan di kas ku no ta finalisá pa motibu di entre otro korupshon. Den e trayekto di “Mi Casa Ya” no tin kontratista fiho ku ta traha kuné. Tur e kontratistanan tinku kompetí i a base di loke nan por òf ta ofresé, e kliente ta skohe esun ku e ta sintié bon kuné. Esaki ta pone ku e kalidat di e bibiendanan mes a subi drástikamente. Por pensa na kalidat di dak, flur i kosnan èkstra manera pisina i gimnasio.
Minister Velasco ta sigui splika ku e riesgo pa Estado den e trayekto aki ta kasi nulo. Un dje strategianan ta ku ta banko i kontratista ta hinka mas sèn i ta kore e riesgonan. Esaki ta nifiká Gobièrnu por ta sigur ku e bankonan i kontratistanan lo hasi tur kos pa nan no pèrdè nan sèn. Banda di esaki, dor ku Gobièrnu ta para garantia, e banko tin mas konfiansa i konsekuentemente e tarifa di interes ta keda abou. E minister aktual di Vivienda ta indiká ku e proyekto aki a duna un impulso enorme durante e pandemia di COVID-19, mirando ku por a sigui traha bai na momentu ku tur otro aktividat den e pais a para. E proyekto riba su kurpa tin efekto positivo riba diferente área, manera esun sosial i ekonómiko. Gobièrnu kolombiano tin asta insentivonan manera èkstra supsidio pa hóbennan entre 18 i 28 aña. A keda tresé dilanti tambe ku tin aspektonan di mehoransa na e proyekto manera por ehèmpel e momento ku Gobièrnu ta duna e supsidio. Esaki por sosodé for di momento ku e kliente hasi e petishon pa un kas òf na final ora banko duna su aprobashon. Tin maneranan mas efisiente kon pa atendé ku e punto di momentu di duna e supsidio. E minister ta urgi mandatarionan di Kòrsou den e kaso aki pa siña for di e foutnan di nan i pa asina tin espasio pa pone atenshon na e otro retonan ku por bini ku e proyekto di “Mi Casa Ya” pa nos pais.
Mèrdia e delegashon a hasi un bishita na e kontratista di mas grandi ku a traha kas den e trayekto di “Mi Casa Ya”, kual ta Amarilo. Despues di un presentashon ekstenso di e Presidente di Amarilo, e delegashon a hasi un rekorido na pia i seguidamente den bùs pa haña un bista di e tipo di kasnan ku e kontratista aki tin ta trahando. Mester bisa ku e kontratista aki ta diseñá i traha barionan kaminda hende por kumpra kas. Amarilo tin e asina yamá “ciudad verde” kaminda mas ku 50.000 famia ta biba. E barionan aki ya ta konsistí di skolnan, supermerkado, parkenan di rekreo ets. Algu hopi impreshonante un biaha mas pa mira kon fásil por hasi pa un hende òf famia yega na un bon kas ku ta di nan. Mayoria di e kasnan aki ta kosta entre 30.000 pa 50.000 dòler merikano. Kada bario tin su mes diseño i su aspektonan ku ta tipifiká e bario. E loke Amarilo a konstruí ta manera un siudat den e siudat di Bogota.
