Wikent di Atletismo

Klup di Atletismo The Eagles den fin di siman benidero lo tin su tradishonal kompetensia durante kua nos hóbennan atleta den e diferente kategorianan di edat lo ta riba pista di SDK. Ku patrosinio di RBC i bou ouspisio di Curacaose Atletiek Bond (CAB), un kantidat di alrededor di 200 atleta lo ta riba pista tantu djabièrnè anochi, kuminsando 6’or di atardi, komo tambe djasabra durante hinter dia.  Djasabra ta start for di 9’or di mainta i bai finalisá 5’or di atardi.

Ademas dje hecho ku ta nan tradishonal kompetensia di tur aña na e altura aki, e  kompetensia pa hobennan di 15 pa 19 aña lo ta bálido tambe pa buska nan klasifikashon pa CARIFTA, ku lo tuma lugá den e wikènt di Pasku di Resurekshon na e isla di Grenada. Tur e 13 atletanan ku ya a klasifiká lo ta den akshon e wikènt aki i huntu ku nan vários mas kendenan ta bai buska nan klasifikashon. Por sierto ku esaki ta pa promé biaha den historia di atletismo di Korsou ku ya un kantidat asina grandi di atleta a kumpli ku eksigensianan mará na resultadonan di kompetensia, pa nan por forma parti dje delegashon di Korsou.

Por sierto ku djasabra atardi lo tin tambe e kompetensia di relevo di skolnan.

Tur hoben pero tambe mayornan, ta keda invitá na SDK. Entrada ta Fl.5,– pa wikent of 3 florin pa dia. Mucha te ku 12 aña ta gratis.

Bin mira nos top atletanan den kompetensia.

Pa mas informashon: Sidney Valks, cel nr:  5999 569-1759