DICK ADVOCAAT I NOS SELEKSHON NASHONAL LO TA NA TURKIA PA UN ‘TRAININGSKAMP’!

Nos selekshon nashonal maskulino lo ta di 18 pa 25 di mart próksimo na Turkia komo preparashon pa nos partidonan di kualifikashon pa Mundial di FIFA den luna di yüni 2024.

Nos selekshon dirigí pa Dick Advocaat lo hunga 2 partido na Alanya. E promé lo ta 21 di mart kontra Hull-City (Championship) pa despues enfrentá Alanyaspor (Süper Lig) di Leroy Fer dia 24 di mart binidero. Nos selekshon lo hospedá den hotèl Titanic Delux Golf hotel na Belek, Turkia.

 

Sr. Advocaat a inkorporá Raymond Mulder, e entrenadó di portero di ADO Den Haag, den su kuerpo tékniko pa nos ta mihó prepará pa e próksimo kompromisonan aki.

Nos ‘bondscoach’ ta konsiderá e biahe aki komo un bon oportunidat pa su kuerpo tékniko sera konosí ku e hungadónan di nos selekshon pero tambe e promé paso den nos trayekto pa kualifikashon pa Mundial. Manera ya nos a avisá, nos promé enkuentro lo ta dia 5 di yüni próksimo kontra Barbados aki na Kòrsou miéntras nos segundo partido lo ta kontra nos ‘hermana isla’ Aruba aya na Aruba dia 8 di yüni 2024.

 

Dick Advocaat ta deklará: “Apesar ku nos selekshon no ta kompletu ainda, mi ta hopi kontentu ku e biahe aki. E ta un muestra di nos profeshonalismo. Aparte di esei mi por train bon ku e hungadónan ku si ta disponibel i mi por tin un bon evaluashon di kada un.’’

 

Pues pronto e preparashonnan lo start pa nos selekshon su kompromisonan importante ku tin na kaminda.

Keda pendiente pa mas informashon…

 

6 mart 2024