Ministerio di GMN ta konfirmá akuerdonan ku Betesda pa aliviá situashon finansiero delikado.
Ministerio di GMN ta konfirmá akuerdonan ku Betesda pa aliviá situashon finansiero delikado.
Ministerio di Salubridat Públiko, Medio ambiente i Naturalesa (GMN) ta konfirmá ku a sera akuerdonan ku Fundashon Verpleeghuizen Curaçao (Betesda) pa aliviá e situashon finansiero delikado. Na mesun momentu, dòkter Rog, direktor di Betesda, mester duna kuenta di e gastunan hasí.
Betesda, un aktor importante den kasnan di kuido na Kòrsou, ta enfrentá problemanan serio den ámbito finansiero. Debí na e problemanan finansiero aki, e instituto no a paga impuesto for di 2018 i e debe di impuesto a oumentá te ku alrededor di 15 mion florin.
Pa garantisá kontinuidat di Betesda i empleo di su trahadónan, Betesda i GMN a reuní na numeroso okashon. Minister di GMN a hasi su esfuerso aktivamente pa buska solushon pa e problemanan finansiero di Betesda.
Na yüni 2023, Betesda a risibí un supsidio di un biaha di 2.013.000 florin pa a rekuperá di e retraso krítiko (613.000 florin), kumpra materialnan sumamente esensial (1.250.000 florin) i un bùs nobo pa transporte (150.000 florin).
Na òktober 2023, Betesda a risibí informashon tokante un proposishon pa mehorá e situashon finansiero. Esaki a kondusí na reunionnan adishonal entre GMN, Betesda, Curaçao Medical Centre (CMC), i Banko di Seguro Sosial (Sociale Verzekeringsbank – SVB).
Na desèmber 2023, a yega na un akuerdo kaminda Betesda lo disponé di 40 kama pa kuido di korto plaso pa pashèntnan for di CMC, ku lo wòrdu finansiá pa SVB.
E servisio aki a originá for di karga muchu grandi ku a surgi na CMC relashoná ku kuido di korto plaso no urgente pa pashèntnan ku no mester keda den hòspital mas, pero ku pa diferente motibu no por bai kas.
Ku e 40 kamanan aki, Betesda lo haña entrada adishonal di mas o ménos 1.5 mion florin pa aña. E entrada adishonal aki lo kontribuí na aliviá e défisit finansiero di Betesda.
E kondishonnan di e akuerdo di presupuesto ku SVB i e kolaborashon ku CMC lo ta kordiná entre e partidonan mes. Den esaki, lo mester yega na akuerdonan kla tokante e kalidat di e kuido di korto plaso ku lo mester ofresé. Ademas, nan lo mester yega na akuerdonan di trabou kla tokante e transferensia sigur di pashèntnan for di CMC pa Betesda.
E minister a konfirmá e akuerdonan e siman aki den un karta na Betesda, kaminda e ta duna kontesta na e petishon pa yudansa di Betesda. Komo resultado di esaki, Betesda a akordá pa no sigui tuma mas medida den e prosedimentunan legal ku ta andando kontra gobièrnu.
Na final di 2024 lo tuma lugá un evaluashon di e akuerdonan aki i lo determiná kon i bou di kua kondishon Betesda lo sigui ofresé e servisio aki.
Betesda a presentá un rapòrt 28 di febrüari último, pa responsabilisá e gastunan hasí ku e supsidio di un biaha di 2.013.000 florin. Sin embargo, e rapòrt ainda tin algun punto ku no ta kla den dje ku Betesda mester duna klarifikashon adishonal riba dje. Si Betesda no duna kuenta i rason na un manera adekuá, minister lo tuma e medidanan apropiá kontra Betesda.
Ministerio di GMN ta keda hasi tur esfuerso pa garantisá kontinuidat di Betesda komo un aktor importante den kas di kuido i pa empleo di nan trahadónan. Minister Silvania lo no tolerá nunka ku fondonan di impuesto ta wordú usá pa metanan inhustifiká, i lo no tembla pa tuma akshon ku man duru kontra akshonnan inatmisibel.
