PAR Ana Maria Pauletta KARTA situashon rondó di rekohementu di sushi.
Minister di Salubridat, Medio Ambiente i Naturalesa
Sr. J. Silvania i sr. Pisas
Colon
Presente
Kòrsou, 14 mart 2024
Tópiko: situashon rondó di rekohementu di sushi!
Apresiabel Minister Silvania i/òf minister Pisas,
Durante di e último siman suskrito a risibí bastante keho pa ku e echo ku Selikor no ta pasa rekohé sushi di kas na tempu. Esaki ta kousa basta molèster i preokupashon serka e komunidat ku nos ta sirbi. Molèster di keda pendiente riba nan kliko para pafó di kas i molèster ku nan kliko ta asina yen, te ku mester pone sushi riba e kliko.
A yega di pasa ku siudadanonan den desesperashon a tuma e desishon pa dùmp e sushinan aki den mondi òf asta kima esakinan di forma ilegal. Esaki ta un desaroyo ku nos kier evitá di tur manera. Kuantu biaha nos no ta mira, ku sushinan ku no ta bon kubrí, ta bira e lugá ideal pa kachónan di kaya buska nan kuminda di dia?.
Pone sushi afó, pa simannan largu, no solamente ta desaroyá un bista desagradabel, pero tambe ta kousa un riesgo pa salú públiko i seguridat di e komunidat. Ta keda evidente ku e situashon a yega na un punto krítiko i ta rekerí akshon urgente.
Den kuadro di tur esakinan, suskrito tin algun pregunta:
- Minister lo por informá Parlamento, si Selikor tin difikultat pa rekohé sushi den sierto barionan. I kua ta e motibunan pa ku esaki?
- Kua ta e maneho ku Selikor tin, pa rekompensá e siudadano, ora ku repetidamente Selikor no pasa rekohé nan sushi di kas?
- Ministerio di GMN a palabra un supsidio adishonal pa Selikor, esaki ta pa atendé ku rekohementu di sushi, esaki a sosodé?
- Minister lo ta dispuesto pa organisá un kumbre riba “maneho di sushi”, kaminda tur aktornan por partisipá i formulá un vishon komun pa ku esaki?
Danki di antemano,
Ana Maria Pauletta
Miembro di Parlamento, Partido Alternativa Real