Mega fiesta di bachata ku Zacarías Ferreíra, Ephrem J i ICONS KJ74 Entertainment a presentá “Sabrosura”
Mega fiesta di bachata ku Zacarías Ferreíra, Ephrem J i ICONS
KJ74 Entertainment a presentá “Sabrosura”
WILLEMSTAD: Resientemente KJ74 Entertainment a presentá e proyekto “Sabrosura” na miembronan di prensa. E konferensia di prensa kombiná ku un Presidente happy hour a tuma lugá na ‘The Beer’ na Sta Maria. Durante di e atardi a duna informashon di “Sabrosura” ku lo tuma lugá dia 13 di aprel próksimo den WTC ku presentashon di Zacarías Ferreíra, Ephrem J i ICONS. Masha hopi fanátiko ya kaba a sigurá nan entrada pa WTC riba djasabra di 13 di aprel próksimo. Zacarías Ferreíra, mes a anunsiá riba su retnan sosial ku e ta masha entusiasmá pa su próksimo bishita na Kòrsou i a hasi un kordial invitashon na su fanátikonan pa presensia su presentashon ku lo inkluí hitnan di semper manera “Es Tan Dificil”, “Asesina”, “La Mejor de Todas”, “Mañana en tu Olvido”, “Amiga Veneno”, “La Avispa” i mas, tambe e klásiko bachata i su hitnan di mas nobo.
Riba e anochi di “Sabrosura” tambe lo duna su presentashon, Kòrsou su sensashon di bachata i realmente un eksponente pa e género, Ephrem J. Un kantante ku dominio total di e género i ku ta risibí asta elogio di artistanan internashonal pa su ekselente presentashon. Ephrem J, tantu aki na Kòrsou komo internashonalmente ta kanta ku artistanan di promé fila i riba e anochi di “Sabrosura” lo no ta diferente. “Baila, Baila”, “Nada”, Cuando Se Acaba El Placer”, “Como Una Oracion”, i muchu mas lo zona riba e anochi espektakular di “Sabrosura” den WTC. Ephrem J lo keda respaldá pa su banda internashonal ku kual tambe pronto e lo kuminsá su ‘tour’ den Europa.
“Sabrosura” lo konta tambe ku presentashon di ICONS, banda di aña ‘23, i Dj Jose i RA1000. ICONS lo tin un repertorio ahustá p’e anochi ku lo inkluí un variashon di merengue, salsa, bachata, i mas! Karchinan early-bird a kaba den un dia, mesora a kuminsá ku tanda di benta general awor ainda na 65 florin optenibel na Ticketpoint na Zeelandia, 24 Uur Uit De Muur i Mensing’s Caminada. Karchinan VIP na balor di 125 florin ta optenibel únikamente na Ticketpoint na Zeelandia i 24 Uur Uit De Muur. Keda pendiente pa un ‘PRESIDENTE SPECIAL’ riba karchi general. Pa reservashon di mesa por yama 696.9237. Que sabrosuraaaa!
