BISHITA DI EMBAHADOR DI COLOMBIA

Willemstad – Minister di Enseñansa, Siensia, Kultura i Deporte (ESKD) sr. Sithree van Heydoorn a risibí na su despacho embahador di Repúblika di Colombia na Reino Hulandes, sra. Carolina Olarte Bácares. Durante di un kòmberashon ameno a sera konosí ku otro i kòmbersá tokante diferente tópiko interesante.

Minister tabata kompañá pa un delegashon ku huntu a kòmbersá i dialogá tokante tópikonan interesante. Tópikonan manera estudio universisatio na Colombia, interkambio kultural, edukashon i formashon den e área di agrikultura. Tambe a kòmbersá di e bishitanan anterior ku minister a hasi na Colombia, kaminda a firma akuerdo ku institutonan edukashonal. Minister su meta ta pa firma mas akuerdo ku ta brinda mas oportunidat na nos alumnonan pa hasi nan estudio di forma internashonal. A la bes ta e intenshon pa nos haña e deskuento finansiero di e estudio na momento ku nos tin akuerdo firmá ku e instituto. E tema ‘Servicio Nacional de Aprendizaje de Colombia’ (SENA) tabata ampliamente diskutí komo ku e ta un instituto nashonal kaminda formashon vokashonal i tékniko ta duná di forma gratuito. Esaki ta sirbi komo un ehèmpel pa nos pa motibu ku aki bo ta haña e dinámika entre komèrsio i formashon di e alumno. Pasombra ta eduká e alumno pa e drenta merkado laboral di forma mas efisiente.  

E tema di Ekonomia Oraño, kaminda e interkambio kultural ta e enfoke, tambe a diskutí. Ta e intenshon pa traha huntu ku Colombia pa nos traha riba un interkambio kultural duradero i ku ta stimulá e desaroyo ekonómiko.  

Di un forma amikal minister Sithree van Heydoorn a yama e embahador danki pa e bishita i a bai di akuerdo pa sondia posibilidat pa traha huntu den futuro. 

— 

KOMUNIKASHON 

**Riba e potrètnan athunto por tuma nota di e bishita di e embahador di Colombia.