REUNION KU SEKRETARIO DI ESTADO

WILLEMSTAD – Minister di Enseñansa, Siensia, Kultura i Deporte sr. Sithree van Heydoorn a tene un reunion ku Sekretario di estado sra. Alexandra van Huffelen relashoná ku vários tópiko importante pa enseñansa. Despues a sigui ku un bishita na e skol di fundeshi Kolegio Erasmo.  

Durante di e reunion Minister di ESKD a tene un presentashon riba e temanan programa pa mehorashon di enseñansa, plan di mantenshon di lokalidat di skolnan, proyekto teoria di kambio, optimalisashon di estudio pa dosente, adaptashon di método di finansiamentu, kuido di alumno, desaroyo di un aplikashon digital pa enseñansa (CLOA) i vários tema mas. Tur e temanan ta forma parti integral di e Programa pa Mehorashon di Enseñansa 2023-2028 ku ta den ehekushon aktualmente.   

Despues di e reunion minister sr. Sithree van Heydoorn huntu ku sekretario sra. Alexandra van Huffelen a bishitá skol di fundeshi Kolegio Erasmo ku ta ubiká aktualmente den e lokalidat di un skol di kambio; skol di fundeshi Cola Debrot. Nan tabata risibí pa direktor di Fundashon Skol Humanista na Papiamentu (FSHP) sra. Nihayra Leona, representantenan di Stichting Onderhoud Schoolgebouwen (SOS) i otro dignatario di enseñansa. Alumnonan di e skol a risibí minister i sekretario di estado den un ambiente ameno. Nan a tene vários presentashon di forma kultural i gosa huntu ku tur e bishitantenan. Tambe a tene un rekorido chikitu den algun klas di e skol. 

Tambe a bishitá e lokalidat mes di e skol ku ta forma parti di e plan di mantenshon di lokalidatnan di e skol na Kaya Havana. Aki sekretario di estado sra. Alexandra van Huffelen huntu ku direktor di Enseñansa i Siensia sr. Wladimir Kleinmoedig a haña un rekorido den e edifisio ku ta den renobashon i tambe nan e sera konosí ku e kontratista- i arkitektonan lokal ku ta traha riba e proyekto akí.