Presupuesto di Parlamento di Kòrsou, e kuadro legal pa trata esaki for di 10 òktober 2010.

Presupuesto di Parlamento di Kòrsou, e kuadro legal pa trata esaki for di 10 òktober 2010.

Parlamentario Curtley Obispo den e reunion di Parlamento di Kòrsou di dia 29 aprel 2019, a mustra ku for di 10 òktober 2010, e Presupuesto di Parlamento di Kòrsou ta wòrdu trata den e kuadro legal di entre otro: (1) artíkulo 85 insiso 1 i 2 di Areglo di Estado di Kòrsou, (2) E Lei di Komptabilidat di Kòrsou i (3) artíkulo 21, 47  i 48 di Reglamentu di Órden di Parlamento di Kòrsou. Reglamento di Órden di Parlamento di Kòrsou den artíkulo 21 ta indiká ku Parlamento di Kòrsou ta outónomo den fiha su propio presupuesto. Presidente di Parlamento di Kòrsou òf Griffier na nòmber di Presidente di Parlamento di Kòrsou ta enkargá ku e maneho di presupuesto di Parlamento di Kòrsou. Tambe e proseso di e promé kalkulashon di presupuesto pa e siguiente aña, ta kuminsá den e komishon di Asuntunan Doméstiko di Parlamento di Kòrsou. E promé kalkulashon di presupuesto ta konsistí di e presupuesto di kuenta koriente (“gewone dienst”) i un presupuesto di kapital (“kapitaaldienst). Ora e promé kalkulashon di e Presupuesto di Parlamento di Kòrsou wòrdu aprobá den e komishon di Asuntunan Doméstiko, e Presupuesto di Parlamento di Kòrsou, ta wòrdu trata den un komishon sentral i un reunion publiko.

Despues e presupuesto di Parlamento di Kòrsou tin ku wòrdu entrega no mas tarda ku 1 mei, pa asina e wòrdu inkluí dor di Gobièrnu di Kòrsou den e Presupuesto di Pais Kòrsou. Parlamento di Kòrsou ta trata i aprobá henter e Presupuesto di Pais Kòrsou den e último kuartal di aña den un komishon sentral i un reunion publiko. Den e kuadro legal ariba menshoná, for di 10 òktober 2010, Presupuesto di Parlamento di Kòrsou ta wòrdu kontrolá 4 biaha dor di Parlamento di Kòrsou.