señor Rennox Calmes Sr. Pisas e miho marioneta di Hulanda

March 26, 2024 REDAKSHON

Parlamentario Rennox Calmes

3 aña a pasa, tur Kòrsou su defisitnan den Reino a keda status quo

Sr. Pisas, e mihó Marioneta di Hulanda. Falta duna kuenta i rason riba hopi aspekto
Asta su mes pueblo di Banda Bou e a lubidá, asfaltá no ta eliminá hamber i pobresa

Lider polítiko di Partido Trabou pa Kòrsou, Sr. Rennox Calmes ta taha pueblo pa no aseptá mediokresia serka e gobièrnu aktual tampoko. No laga e gobièrnu tapa lokual e no ta hasiendo, ku populismo.

Sr. Pisas for di na inisio a purba manipula pueblo ku te a ninga COHO, siendo ta Trabou pa Kòrsou a bin ke strategia i logra basha COHO abou via parlamento. Ta fresku den mi memoria ku na luga di MFK rechasá COHO, MFK a siguí traha riba COHO 2.0 i 3.0 di MFK. For di e tempu ei por a sospecha ku Gabinete Pisas ta bai ta un marioneta di gobièrnu Hulandes. Tempu a resultá e mihó maestro. Febrüari 2024 gobièrnu huntu ku su 13 parlamentario nan asepta landspakket den presupuesto den tumba. Landspakket tabata mará na COHO. Pa kiko MFK a bati PAR pero a aseptá loke PAR a negoshá. Landspakket ta di PAR. Pero Minister Presidente Sr Pisas ta firmando e areglo mutuo mas lihé ku Sr Rhuggenaath. Bou di e maneho di Sr. Pisas, gobièrnu Hulandes a burla di parlamento di Kòrsou, dal un stap patras for di COHO i bai via un areglo mutuo. Pues un akuerdo entre gobièrnu ku gobièrnu so. Chèri riba e bolo ta ku Gabinete Pisas a hasi gobièrnu di Hulanda e fabor pa hinka e landspakket den presupuesto den tumba. Na final Hulanda ta bolbe hari nos. Bou di maneho di gabinete Pisas, tur trayekto ku hulanda ta kana lihé, te awe por kòrda kon lihé gabinete Pisas a pasa e lèi di 12.5%, pero te awe, 3 aña después, sindikato nan ta bringa pa kaba di atendé e 12.5%.

Sr. Calmes ta mustra riba otro área nan ku Gabinete Pisas a keda ketu riba djé i no ta informando pueblo. Ta área nan ku pa un país krese, mobilisa bai dilanti i krea laso ku otro paísnan di Karibe ta importante. Manera entre otro, kon ta para pa Kòrsou bira miembro di un of otro manera di Caricom? Kiko a para ku asuntu di dekolonisashon? Gabinete Pisas no ta mustra interes pa investigá esakinan. Kon a para ku hinter e proseso di dañonan hasi den tempu di sklabitut i reparashon pa esakinan? Trabou pa Kòrsou a presenta e “ten point plan” ku otro paísnan den Karibe a uza i logra. Unda por mira i sinti avanse di formashon patriotiko bou di Gabinete Pisas. Unda a tuma lugá kambionan simboliko fundamental i signifikativo pa pueblo riba e área di patriotismo i eliminá kolonialismo? Unda Gabinete Pisas a atendé ku defisitnan den Reino? Defisit den konseho di minister di Reino, defisit den statuto, defisit den “ tweede kamer” ora ta atendé tratado international. “Geschillenregeling” no tin prioridat. Unda Gabinete Pisas a keda ora ku mester a figa posishon ku Kòrsou ta país di pas, ora ku Hulanda ta mete den guera di Rusia i Ukrania? Niun komentario. Gabinete Pisas a keda di habri refineria 3 okashon i asta laga yen hende skirbi nòmber pa kuminsa traha. A keda di pon’é instalashon di gas via e kompanía “eagle”. Te awe nada. Kiko a hasi pa solushona e problema di fondo di AOV? Kiko a hasi pa baha edat di penshun? Kiko a hasi pa baha gastunan di remedi? Kua pilá di ekonomia nobo a krea ku ta paga bon i no “minimumloon” so?

Sr. Calmes ta bisa ku asta Pueblo di Banda Bou Sr. Pisas a laga na kaya. Ketu bai pobresa ta dominá den área di Banda Bou, e parti sosial den área di hanchi Buriku, Klein Sta Martha i bisindario a keda meskos. Ta asfalt so nan a basha pa nan, pero e situashon nan deplorabel a keda meskos. Ahinda Banda Bou tin un kaminda so pa yega serka nan. Ki dia ta asfalta e kaya via di Bullenbaai? Ki dia ta uza teknologia pa hasi e kaminda pa bai Banda Bou 3 fila? Mainta 2 fila ta bai pariba i 1 ta bai pabou i atardi 2 fila ta bai pabou i 1 ta bai pariba? Poblashon di Banda Bou a krese pero ahinda no tin un poli ku un Hospital mediano pa Banda Bou ku sikiera algun kamber, un botika 24/7. Pa tiki skol ku Banda Bou tin, no a kue ni 1 i hasié e skol modelo kompletamente ekipá ku materialnan i personal manera sosiologo, pedagogo, logopedist etc etc. Tampoko no a uza niun skol na Banda Bou pa ta un ehèmpel poniendo aktividatnan di después di skol manera arte, deporte i músika bou di guia di profeshonal nan. Ni e problema di ladronisia di kabritu no a wòrdu atendé. Pueblo di Banda Bou, Minister Presidente Sr.Pisas ta di bosnan, pero e la lubida bosnan. E ta pensa ku asfalta algun kaya ta yena bosnan barika i duna bosnan trabòu.