AKUERDO RELASHONÁ KU TRANSPORTE ESKOLAR A BIRA REALIDAT

Willemstad – Ministerio di Enseñansa, Siensia, Kultura i Deporte, sektor di Enseñansa i Siensia, a firma akuerdo ku Autobusbedrijf Curaçao N.V. (ABC) relashoná ku koordinashon di transporte eskolar pa aña 2024. A hasi traspaso di koordinashon di transporte eskolar pa ABC for di ougùstùs 2022. Esaki a tuma lugá den bon kooperashon ku e organisashonnan SITEK i ATE.

E akuerdo di atministrashon (beheeroverkomst) ta vigente for di 1 di yanüari te ku 31 di desèmber 2024 i ta deskribí, entre otro, tareanan ku ABC ta enkargá kuné den e kuadro di transporte eskolar, presupuesto disponibel pa aña 2024, i reglanan di bon gobernashon pa ku implementashon di e presupuesto. 

Direktor di Enseñansa i Siensia sr. Wladimir Kleinmoedig huntu ku gerensia di ABC ke felisitá tur partido ku a traha pa e logro monumental akí. E logro akí ta sirbi komo un bon base pa por krea oportunidat pa sera otro kombenio di kooperashon entre e partidonan. 

— 

KOMUNIKASHON 

*Riba e potrètnan athunto por tuma nota di e momento ku a firma e akuerdo.