KONTROL RIBA USO IREGULAR DI AWA I KORIENTE TA DUNANDO RESULTADO
KONTROL RIBA USO IREGULAR DI AWA I KORIENTE TA DUNANDO RESULTADO
Willemstad 27 di mart 2024 – E tim di Aqualectra ku ta kontrolá riba uso iregulá di awa i koriente a bolbe dal den un gran kantidat di kas i negoshi ku ta hasi uso ilegal di awa i koriente durante di nan kontrolnan. Entre 17 di yanüari pa 18 di mart último a kontrolá mas ku 879 negoshi i bibienda. E tim a parti but pa 14 negoshi i 156 bibienda. E butnan mas haltu ku a keda partí tabata 15.000 florin na algun negoshi den Punda (1), Otrobanda (1), Groteberg (1), Rooseveltweg (2), Saliña (2), Schottegatweg (1), Mahaai (2) i na Winston Churchillweg (2). E barionan ku a kontrolá i kaminda a haña mas kas ku ta hasi uso ilegal di awa i òf koriente tabata Brakkeput (12), Montaña Abou (10), Piscadera (9), Saliña (9), Mahuma (7) i Souax (5). E kontrolnan di e tim di Aqualectra ta sigui i kaminda topa uso iregulá di awa i/ òf koriente lo aktua sigur.
Personanan ku ta hasi uso di awa i koriente ilegalmente, dor di manipulá instalashonnan òf dor di kambia òf kita parti di e ret di awa i/ òf koriente, ta kousa hopi gastu adishonal pa klientenan ku sí ta kumpli i paga nan awa i koriente fielmente. E klientenan kumplidó ta karga e gastunan di e uso di awa i koriente, ku no por registrá riba nòmber di ningun persona debí na uso ilegal di awa i koriente dor di tersernan.
Ademas, na momentu ku un hende manipulá e ret di distribushon, nan por kousa situashonnan fèrfelu i disturbio pa e área kaminda nan ta kita por ehèmpel kabel òf pipa di awa. Ta netamente e fenomeno aki Aqualectra ta tratando na kontra arestá, na bienestar di henter nos komunidat.
Ta bon pa enfatisá tambe ku esun responsabel pa su meter ta e propietario di e negoshi òf doño di kas.
Pa e motibu aki ta importante pa raportá na Aqualectra den kaso ku bo tuma nota di algu iregular na e meter òf un kambio den e loke nòrmal bo sa usa na awa i koriente. Di e forma aki bo ta evitá konsekuenshanan fèrfelu.
E tim di kontròl ta sigui ku su trabounan pa detektá i para iregularidat den nos ret di distribushon di awa i koriente. E tim ta konsistí di Aqualectra, Korps Politie Curaçao i Openbare Ministerie. Na momentu ku konstatá situashonnan ilegal na bibienda, negoshi òf otro lokalidat, e habitante òf doño di negoshi por konta ku butnan haltu ku por yega te na 20.000 florin, pago di gastunan pa korekshon di e instalashonnan i posibel denunsia. E personanan aki tambe mester tene kuenta ku banda di e but, nan mester paga pa e gastunan di uzo no registrá di koriente i/ òf awa ku ta mará na e periodo ku e iregularidat tabata tuma lugá i kualke debe bieu.
