Kontrolá bo ‘airbag’: Protehá bo bida!

VVRP ta alertá doñonan di outo pa ‘airbag’ di Takata ku por ta peligroso

“Kontrolá bo ‘airbag’. Protehá bo bida!”

Willemstad – Ministerio di Tráfiko, Transporte i Planifikashon Urbano (VVRP) ta hasi un yamada na tur doño di outo na Kòrsou pa kontrolá si nan vehíkulo tin un airbag di marka Takata ku por ta peligroso. Na nivel mundial, miones di vehíkulo a ser yamá bèk pa motibu di riesgonan serio di seguridat ku por tin konsekuensianan mortal.

Den kaso di sierto airbag di Takata, e mekanismo ku ta yena e airbag por bira defektuoso debí na bientu di tempu i eksposishon prolongá na kalor i humedat.

Esaki por okashoná ku durante un aksidente, e airbag ta eksplótá i fragmentonan di metal skerpi ta sali ku gran forsa, ku por kousa heridanan grave òf asta morto. E klima kayente i húmedo di Kòrsou ta hasi e advertensia aki èkstra importante.

Kon bo por kontrolá bo vehíkulo?

VVRP ta konsehá doñonan di outo pa tuma kontakto ku nan dealer ofisial òf fabrikante di nan vehíkulo, usando e number di chasis (VIN), pa kontrolá si nan outo ta kai bou di un yamada pa reparashon (recall). Pa mas informashon por bishitá e wèpsait di e outoridat di seguridat di tráfiko di Merka (NHTSA): http://www.nhtsa.gov/vehicle-safety/takata-recall-spotlight.

Pa sierto vehíkulo tin un advertensia ofisial di ‘Do Not Drive’, ku ta nifiká ku no mester sigui kore ku e vehíkulo te ora e reparashon nesesario ta realisá. Generalmente, den kaso di un recall ofisial, ta remplasá e airbag grátis. Ta importante pa verifiká esaki serka e dealer òf fabrikante.

VVRP ta hasi un yamada tambe na dealernan, importadónan i garashinan pa informá nan klientenan aktivamente i asistí nan ku kòntròl di nan vehíkulonan.

Seguridat den tráfiko ta un responsabilidat di nos tur. Ounke un vehíkulo ta funshoná normalmente, por tin un riesgo di seguridat. P’esei, VVRP ta urgí tur doño di outo pa no warda, sino pa tuma akshon na tempu.

“Kontrolá bo ‘airbag’. Protehá bo bida!”