Re Karta di petishon Reunion komishon sentral dor di Minister di Finansa.

 

 

Na Presidente di Parlamento di Kòrsou Sra. Ch. America – Francisca WilhelminaPlein #4
Presente
Kòrsou, 28 di mart 2024
Topíko: Re Karta di petishon Reunion komishon sentral dor di Minister di Finansa.
Apresiabel sra. America – Francisca,
Dia 25 di mart ultimo Minister di Finansa a manda un karta pa bo persona komo Presidente di Parlamento ku komishon sentral tokante rapòrt di SOAB riba investigashon na Landsontvanger.
Nos frakshon a tuma nota di e karta i kier pone na Presidente di Parlamento su atenshon ku Minister a bini parlamento dia 11 mei 2023 riba e asuntu di “kwijtschelding” di belasting i kual te awe minister no a bin parlamento pa duna kontesta riba preguntanan di Parlamento. Despues di basta rekordatorio ku Frakshon di MAN mes a trese na atenshon di Presidente di Parlamento.
Frakshon di MAN kier pone na atenshon di sra. Presidente ku no por ta asina ku ta bai konvoká un reunion nobo riba Belasting/Ontvanger i un reunion ku un topiko similar ta keda di skòrs i minister no ta bin kontesta.
PETISHON
Frakshon di MAN kier hasi 2 petishon na bo persona komo presidente di Parlamento.
1.
Pone reunion di 11 mei 2023 riba agenda di forma ku Minister por bin duna kontesta riba e preguntanan di Parlamento tokante “kwijtschelding” di mas ku 3 miar florin di impuesto ku Minister a duna;
2.
Pa e reunion ku Minister a pidi den un karta fechá 25 di mart 2024 riba rapòrt di SOAB, pa laga Ontvanger sr. A. Trona pero tambe hefe di Inspectie der Belasting sra. J. Isenia tei presente pa duna informashon di nan banda i tambe kontesta preguntanan di miembronan.
Loke ta pasando aki ta kreashon di deskonfiansa total den nos institutonan di impuesto kual ta e kurason di Gobièrno. Ta basta tempu kaba tin un disputa entre Minister i hefenan aki di servisio di impuesto. Mester trese klaridat i nos di Frakshon di MAN tambe kier klaridat i ta desea pa e hefenan tei den sala pa asina hasi pregunta i risibi informashon direkto for di nan.
Komo Presidente di Parlamento bo persona tin e deber di garantisá un funshonamentu optimal di Parlamento komo e organo demokratiko representativo di Pueblo. No por ta asina ku Minister di Finansa te ku dia di awe ta keda sin kontesta preguntanan hasi den reunion di día 11 di mei 2023 riba un topiko di impuesto asina importante i ta rekuri pa pidi otro reunion riba topíko di impuesto.
Atentamente,
Giselle Mc William
Lider Frakshon di MAN