Frakshon di Movementu Progresivo Dr. Marilyn Moses Miembro di Parlamento Preguntana pa Minister di Desaroyo Ekonomiko

Minister di Desaroyo Ekonómiko
Señora Giselle Mc William
Fort Amsterdam 17
Presente
Willemstad, 12 mei 2020
Tópiko: Preguntanan tokante NOW

Apresiabel señora Mc William,

Frakshon di Movementu Progresivo den Parlamento ta sinti hopi falta di transparensha konkreto
den e gastunan ku ta relashoná ku medidanan tumá rondó di e krísis di COVID-19.
Mirando ku pueblo ta pidiendo konstantemente mas informashon i nan ta risibí kontestanan ku
lei di privasidat ta na vigor, nos ke duna di konosé ku den nos opinion, e motibu aki ta unu
inkorekto i inbálido. I ademas e ta krea mas insiertitut den pueblo ku ta sinti ku ta kos di skonde
tin den Gobièrnu.

Frakshon di Movementu Progresivo den Parlamento ta hasi e siguiente preguntanan:
1. Kon e proseso di desishon i akshon a bai pa yega na e funshonamentu di NOW?
2. E lei pa aktivá NOW ofisialmente ta kla i implementá?
3. Si e lei no ta implementá ainda, a base di kua kuadro hurídiko ta ehekutando NOW
promé ku e lei drenta na vigor?
4. Kua komishon i ken ta den e komishon ku a atendé e lantamentu i ehekushon di
akshonnan pa yega na NOW?
5. Ken òf kua kompania ta metí ku e ehekushon di NOW?
6. Kuantu e kompania aki ta risibí den forma finansiero o den otro forma?
7. Kuantu plaka NOW a risibí pa ehekutá su meta?
8. Ken ta kontrolá e kompania ku ta risibiendo plaka pa NOW i unda nan ta aportá?
9. I den ki frekuensia nan ta aportá? Pa siman?
10. A base di ki reglanan i normanan ta evaluá si un kompania mester risibí ayudo finansiero
di gobièrnu òf no?
11. Kuantu kompania a pidi pa por hasi uso di un sosten finansiero menshoná?
12. Kuantu kompania a keda aprobá i kuantu a risibí plaka kaba?
13. Nos ke risibí un lista di e kompanianan ku a risibí sosten di Gobièrnu i e kantidat ku nan
a risibí.
14. Tambe nos ke komprondé kiko ta e plan di eksistensia di NOW. Pa kuantu tempu NOW
ta keda implementá?
15. Kua instansha di Gobièrnu, a keda nombrá pa kontrolá e kompanianan si despues ku nan
a risibí nan sosten di gobièrnu ku nan a kumpli ku nan empleadonan?

Atentamente,
Frakshon di Movementu Progresivo
Marilyn Moses
Miembro di Parlamento

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: