Minister Hato debidámente tin atenshon pa situashon na país Haiti

Kòrsou, 08 aprel 2024
Minister di Hustisia, mr. Shalten Hato a tuma nota den Prensa di un karta di ombudsman,
sr. Keursly Concincion, relashoná ku situashon na país Haiti i tambe unda ombudsman ta
urgí Minister pa duna oído i atenshon na e situashon aki. Sinembargo, Minister Shalten Hato
ta lamentá ku ombudsman no a tuma kontakto ku su persona, i a manda un karta pa
parlamento relashoná ku e situashon aki. For di Mart 2024, pa ta eksakto 10 di mart último,
Minister di Hustisia a tuma nota di e situashon na país Haiti i ya a kuminsá traha di forma
pro-aktivo pa e situashon aki.
For di luna di Mart último, e tim di Imigrashon huntu ku diferente otro stakeholders di
Hustisia a sinta na mesa pa atende e problemátika aki. A yega na akuerdo entre tantu ku lo
no emigrá persona(nan) ku a bini for di Haiti na Kòrsou i ku entre tantu nan estadia na nos
pais a kaduka. Esaki den kuadro di seguridat ku pais Kòrsou tambe kier brinda na e
habitantenan aki, relashoná ku e situashon na nan pais. Servisio di Imigrashon a risibí
despues di e reunion aki e instrukshon pa na momentu ku durante kualkier tipo di kòntròl
rutinario enkontrá ku persona(nan) ku ta prosedente di Haiti i ku no tin nan dokumentonan
na òrdu òf dokumentonan ku a kaduká, ku nan lo no ser emigrá for di nos pais, pero ku nan
lo risibí instrukshon di mèldu nan mes na imigrashon na momentu ku ta nesesario pa esaki.
Minister di Hustisia a bogá na e komishon, pa nos tambe komo país brinda seguridat na e
persona(nan) aki i asina vigilá e situashon alarmante ku tin den e país enkuestion. Ministerio
di Hustisia lo kontinuá vigilá e situashon hopi di aserka pa asina hasi kualkier adaptashon
na tempu i lo kontinuá ku vigilá e situashon pa asina re-evaluá kuakier medida èkstra ku lo
mester tuma den kuadro di e situashon na Haiti.