Residentenan di Saba lo risibí ‘zorgpas’ promé
SABA – Riba 22 di aprel, Kuido i Hubentut Hulanda Karibense (ZJCN) ta introdusí e zorgpas na Saba. Den kurso di e aña, Sint Eustatius i Boneiru lo sigui. E zorgpas ta un karchi individual pa fasilitá e entrada na atenshon médiko urgente den eksterior pa residentenan asegurá di Hulanda Karibense. Ta trata di tratamentu médiko urgente ku no por posponé.
Zorgpas komo prueba di seguro
E zorgpas ta remplasá e prueba di seguro. Aseguradonan no mester bai ofisina di ZJCN mas pa buska un prueba di seguro promé ku nan bai biaha. Riba e zorgpas no tin solamente e informashon di e asegurado, sino tambe e informashon di kontakto di ZJCN. Den kaso di atenshon médiko urgente den eksterior, ta importante pa tuma kontakto ku ZJCN mas pronto posibel. Ademas, por usa e zorgpas na botika i laboratorio na Saba.
Zorgpas no ta un seguro di biahe
E zorgpas ta solamente pa emergensianan médiko urgente den eksterior ku no por posponé. ZJCN ta konsehá tur residente di Hulanda Karibense pa sera un seguro di biahe promé ku biaha pa eksterior.
Rekohé zorgpas
Ta invitá residentenan asegurá di Saba pa buska nan zorgpas durante periodonan spesífiko segun aña di nasementu, manera indiká aki abou:
| Aña di nasementu | Periodo pa rekohé | Orario habrí |
| 1900 – 1940 | Djaluna 22 di aprel – djabièrnè 26 di aprel | 9 or di mainta – 12 or di mèrdia 2 or – 6 or di atardi |
| 1941 – 1981 | Djaluna 29 di aprel – Djabièrnè 3 di mei Djárason 1 mei ta será |
9 or di mainta – 12 or di mèrdia 2 or – 6 or di atardi |
| 1982 – 2024 | Djaluna 29 di aprel – Djabièrnè 3 di mei Djárason 1 di mei ta será |
9 or di mainta – 12 or di mèrdia 2 or –6 or di atardi |
| Formulario di representante/outorisashon | Djaluna 6 di mei – Djabièrnè 10 di mei Djaweps 9 di mei ta será |
9 or di mainta – 12 or di mèrdia 2 or – 6 or di atardi |
Lugá: Ofisina di RCN- SSO. Matthew Levenstone Street #5
Tur residente di Saba ku tin un periodo di aseguransa di mínimo 2 aña lo risibí un zorgpas personal. Mayornan di muchanan menor di 18 aña por buska e pas di nan yiunan. E durashon di e zorgpas ta varia entre 2 pa 5 aña, dependiendo di e periodo di aseguransa.
Na momentu di buska e pas, ta nesesario pa mustra un sédula, pasport òf reibeweis bálido. Tambe ta pidi pa mustra un karchi di banko, pa por registrá e number di kuenta di banko den e base di dato di ZJCN pa futuro rekompensa (mediko). Pa tuma e zorgpas ta gratis.
Formulario di outorisashon
Residentenan di Saba ku ta fisikamente limitá òf tin otro restrikshon, por duna un miembro di famia un mandato atrabes di un formulario di outorisashon, ku ta disponibel online i tambe na ofisina di ZJCN.
Sint Eustatius i Boneiru
Despues di e repartision di e zorgpas na Saba, lo anunsiá na residentenan di Sint Eustatius i Boneiru e momentu di entrega di e zorgpas. Pa mas informashon, bishitá: http://www.zvkcn.nl/