GRAN BALUARTE IDELCO COFFIE A BAI LAGA NOS
GRAN BALUARTE IDELCO COFFIE A BAI LAGA NOS
WILLEMSTAD – Direktiva di AMAK a tuma nota di e notisia tristu ku Idelco Coffie i kantante di vários agrupashon musikal den añanan 60, 70 i 80, a bai laga nos.
Di parti di Sra. di Idelco, nos a haña e informashon ku djasabra próksimo konforme deseo di e defuntu, lo tin un sakrifisio di misa pa 6:30 di anochi na Misa di Groot Kwartier pa deskanso di su alma.
Direktiva di AMAK, pa medio di esaki ta pidi tur músiko ku ke demostrá nan konvivensia ku e famia di e gran baluarte musikal aki pa akudí na e Santu Sakrifisio di Misa.
Idelco Coffie tabata un kantante konosí pa su forma pekuliar di interpretá montuno i guaracha e tempu ei, a militá den vários agrupashon musikal manera Konhunto Universal i despues Estrellas del Caribe.
Idelco tabata un músiko ku na momentu ku ela afiliá na e instituto Estrellas del Caribe, a traha hopi será ku Edgar Supriano, Juan Camelia, Edwin Thomasa i otronan.
Semper Idelco Coffie tabata un músiko kantante positivo ku na momentu ku e mester duna su ayudo den kualkier forma e ta hasi esaki den un forma kompletu.
Den añanan 90, direktiva di AMAK tabata organisá Dia di Baluarte den una di òktober i aki Idelco tabata fungi komo kordinadó di tur e baluartenan di mas edat pa bini huntu den un evento sosial.
Na momentu ku tabata tin inisiativanan pa rebibá Estrellas del Caribe na memoria di Edgar Supriano dfm, Idelco tabata un piesa masha importante den kordinashon i presentashonnan ku a tuma lugá na Rust & Burgh.
Direktiva di AMAK ke ekstendé su profundo kondolensia na famianan di Idelco Coffie, pero tambe na esnan ku tabata forma parti di Estrellas del Caribe ku a marka pouta durante mas di tres dékada na Kòrsou.
Kòrda ku e sakrifisio di misa ta djasabra awor dia `13 di aprel pa 6:30 na misa di Groot Kwartier
Ku su alma sosegá na pas.
Direktiva di AMAK
