Meteorologia pa Aviashon den Reino
Na Kòrsou a tuma lugá un reunion di grupo di trabou meteorologia pa aviashon den Reino.
Despues di restrukturashon den Reino na 2010 a yega e momentu pa revisá e maneho i leinan relashoná ku aviashon di e paisnan den Reino ku e último desaroyonan di Organisashon Internashonal di Aviashon Sivil (ICAO).
Den e kuadro aki a lanta diferente grupo di trabou pa trata esaki den kua maneho i leinan relashoná ku e servisionan di meteorologia pa aviashon tambe ta parti di esaki.
Servisio Meteorológiko di Kòrsou a wòrdu enkargá pa presidí e grupo di trabou di e paisnan den Reino. Durante e tres dianan (9- 11 Aprel) a deliberá riba formanan pa harmonisá e leinan eksistente na Aruba, Kòrsou, Sint Maarten i Hulanda (BES) pa asina fasilitá e implementashon di kambionan ku ICAO ta imponé riba tur su miembronan. Den un presentashon di Meteo, sra. Oswanij Ospino a presentá un estudio di tur normanan internashonal ku Kòrsou tin implementá den nos leinan nashonal di meteorologia. Ta bon pa informá ku tarea di Servisio Meteorológiko den e kuadro aki ta pa duna servisio na aviashon ku e meta pa aportá na e seguridat di aviashon i tambe halsa efisiensia di aviashon.
E resultado di e promé reunion di e grupo di trabou tabata, mirandó e benefisionan pa sigui ku e proseso pa uniformá e leinan nashonal, teniendo kuenta ku e diferente funshon di e Servisio Meteorológiko di Aruba, Kòrsou i St Maarten i di Hulanda pa Bonaire, St Eustatius i Saba. Por mira ku satisfakshon e trabou hasi durante e tres dianan segun señor Martis, direktor di Servisio Meteorológiko Kòrsou ku a presidi e reunion. Riba e potrètnan e diferente delegashonnan Di Aruba, St Maarten, Kòrsou i Hulanda.
.
Seru Mahuma z/n CURAÇAO.Tel:+599 9 8393366.Fax:+599 9 8683999.E-mail: info@meteo.cw
